Úkimet basshysy densaýlyq saqtaý júıesin damytý jóninde keńes ótkizdi
ASTANA. QazAqparat - QR Premer-Mınıstri Baqytjan Saǵyntaev Úkimet úıinde Qazaqstannyń Úshinshi jańǵyrýyn jobalyq basqarý máseleleri jóninde keńes ótkizdi, dep habarlaıdy QazAqparat primeminister.kz-ke silteme jasap.
Densaýlyq saqtaý salasynda osy jyldyń І jarty jyldyǵynyń qorytyndysy boıynsha 73 nysan qurylysy, 46 nysanda kúrdeli jóndeý jumystary, 4 nysanda rekonstrýktsııalaý, sondaı-aq jabdyqtardy jańartý jáne satyp alý jumystary bastaldy. Teksertýlerdi qysqartýǵa, sýbektilerdiń qyzmetine laýazymdy tulǵalardyń aralasýyna jaǵdaı jasaý arqyly bızneske kórsetiletin qysymdy tómendetý úshin 13 baqylaý jáne qadaǵalaý fýnktsııalary shekteldi.
Halyqtyń tsıfrlyq saýattylyǵyn arttyrý úshin emhanalarda 209 tsıfrlyq post quryldy, respýblıkanyń barlyq óńirlerinde alǵashqy medıtsınalyq-sanıtarlyq kómektiń ozyq tájirıbeleriniń ortalyqtary ashyldy jáne 118 medıtsınalyq uıymda aýrýlardy emdeý baǵdarlamasy engizildi.
Nátıjeli jumyspen qamtý máseleleri boıynsha eńbek jáne halyqty áleýmettik qorǵaý mınıstri M. Ábilqasymova eńbek resýrstarynyń aǵynyn josparlaý, boljaý jáne basqarý, kadrlardy daıyndaý jáne qaıta daıarlaý, halyqty ónimdi jumyspen qamtýǵa tartý jáne eńbek naryǵynyń ınfraqurylymyn jańǵyrtý týraly aıtyp berdi.
Nátıjeli jumyspen qamtý jáne jappaı kásipkerlikti damytý baǵdarlamasy aıasynda 290 myń jumyssyz jáne nátıjesiz ózin-ózi jumyspen qamtyǵan azamattarǵa memlekettik qoldaý sharalary kórsetildi. Onyń ishinde 243 myń adam jumysqa ornalastyryldy, onyń 158 myńy turaqty jumys oryndaryna ornalasty. Elektrondyq eńbek bırjasy elimizdiń barlyq óńirlerinde iske qosyldy, sonyń arqasynda 160 myń adam jumysqa ornalasty, 45 jeke jumyspen qamtý agenttigi qosyldy.
