Úkimet basshysy tsıfrlyq habar taratý boıynsha tapsyrma berdi

ASTANA. QazAqparat - Tsıfrlyq teleradıo taratýǵa kóshý mańyzdy áleýmettik joba. Bul týraly búgin Úkimettiń selektorlyq rejımdegi otyrysynda Premer-Mınıstri Baqytjan Saǵyntaev aıtty, dep habarlaıdy QazAqparat tilshisi.

«Tsıfrlyq teleradıo taratýǵa kóshý mańyzdy áleýmettik joba. Sondyqtan barlyq deńgeıdegi úılesimdi jumys pen turaqty baqylaý qajet. Aqparat jáne kommýnıkatsııalar mınıstrligine óńirlermen birge tsıfrlyq efırlik habar taratýǵa kóshýdi ýaqtyly qamtamasyz etýdi tapsyramyn», - dedi Baqytjan Saǵyntaev.

Aıta keterligi, osy másele boıynsha otyrysta baıandama jasaǵan Aqparat jáne kommýnıkatsııalar mınıstri Dáýren Abaevtyń aıtýynsha, Mańǵystaý, Jambyl men Túrkistan oblystary jáne Shymkent qalasy - 2018 jyldyń aıaǵyna deıin, Almaty, Pavlodar, Qostanaı oblystary - 2019 jyly, Shyǵys Qazaqstan, Soltústik Qazaqstan, Qaraǵandy, Atyraý, Qyzylorda oblystary - 2020 jylǵa deıin, Batys Qazaqstan, Aqmola, Aqtóbe oblystary, Astana jáne Almaty qalalary - 2021 jyly kezeń-kezeńimen jańa formatqa aýysatyn bolady.