Úkimet basshysy bıýdjetti ıgerýdegi býhgalterlerdiń qatelikterin atady

ASTANA. QazAqparat - Bıýdjettik saladaǵy buzýshylyqtardyń 80 paıyzdan astam úlesi tehnıkalyq sıpatqa ıe. Bul týraly QR Parlamenti palatalarynyń birlesken otyrysynda QR Úkimet basshysy Baqytjan Saǵyntaev málim etti, dep habarlaıdy QazAqparat tilshisi.

«80 paıyzdan astamy tehnıkalyq buzýshylyqtarǵa tıesili. Atap aıtqanda, bul kemshilikter bizdiń býhgalterlerdiń tehnıkalyq qatelikteri. Bular qarjylyq zań buzýshylyqtar emes, tehnıkalyq ekenin naqtylaǵym keledi. Al qalǵandary júıelik sıpatqa ıe. Sondyqtan da memaýdıt týraly qabyldanǵan Zań aıasynda býhgalterlerdiń biliktiligin arttyrý, aýdıtorlardy sertıfıkattaý jumystaryn júrgizip jatyrmyz. Osy jaıynda birlisken otyrys barysynda Natalıa Godýnova da atap ótti (Esep komıtetiniń tóraıymy- avt.). Budan bólek, endi júıelik sıpatqa ıe kemshilikter boıynsha bizge tıisti máselelerdi sheshý kerek», - dedi Premer-Mınıstr.

Baqytjan Saǵyntaev bıýdjet qarjysyn ıgerýdegi tıimdilikti baǵalaý saladaǵy ádisnamaǵa baılanysty eken atap ótti. Osy oraıda Úkimet basshysy aldaǵy úsh jyldyq respýblıkalyq bıýdjetti daıarlaý kezinde paıdalaný úshin baǵalaýdyń durys ádisnamasyn ázirleý kerektigin jetkizdi.

«Depýtattarmen, Esep komıtetimen birlese otyryp, durys ádisnamany daıarlaýdy usynamyz. Eger qoldasańyzdar, biz bul jumystarǵa birden kirisemiz», - dep túıdi Úkimet basshysy.