Úkimet basshysy bıýdjet qarjysynyń oryndalýyn jiti baqylaýda ustaýdy tapsyrdy
ASTANA. Shildeniń 27-si. QazAqparat /Rýslan Ǵabbasov/ - Aldaǵy Úkimet otyrysynda bıylǵy ekinshi jartyjyldyqtyń maqsat-mindetteri men 2010 jylǵy bıýdjettiń naqtylanǵan aldyn ala jobasy qarastyrylady. Bul týraly búgin bıylǵy birinshi jartyjyldyqtyń qorytyndysyna arnalǵan otyrysynda Premer-Mınıstr Kárim Másimov málim etti.
«Jalpy jartyjyldyq boıynsha nátıjeler jaman emes. Atap aıtqanda, Elbasynyń tapsyrmalary oryndalyp keledi. Alaıda ómir jalǵasýda. Biz qol jetkizgen nátıjelerdi tómendetpeýimiz kerek. Alda kelesi alty aıdyń maqsat-mindetteri tur», - dedi K.Másimov.
Premer-Mınıstr tamyzdyń orta kezindegi kelesi Úkimet otyrysynda bıylǵy ekinshi jartyjyldyqtyń maqsattary men 2010 jyldyń bıýdjetiniń naqtylanýy múmkin jobasyn qarastyrý josparlanyp otyrǵandyǵyn aıtyp ótti. Sonymen qatar, Úkimet basshysy alda birqatar mindetter turǵanyn jetkizdi. Bul Qazaqstanda ótetin EQYU sammıti, aldaǵy Azıada, jyl sońyndaǵy Indýstrııaldyq-ınnovatsııalyq baǵdarlamanyń ekinshi jartysy boıynsha atqarylatyn jumystar, ekinshi jartyjyldyqtaǵy Jol kartasy, «2020 Bıznestiń jol kartasy» mindetteri, sondaı-aq bilim berý, densaýlyq saqtaý baǵdarlamalaryn qabyldaý máseleleri turǵanyna toqtaldy. Munymen qosa, Úkimet basshysy bıýdjettik baǵdarlamalar ákimshilerin bıýdjettiń oryndalýynyń jiti baqylaýda bolýyna nazar aýdarýdy júktedi.
«Biz osy aptada bul máseleni talqylaımyz. Osyǵan qosa, bıýdjettiń ıgerilmeýin naqtylap qarap shyǵyńyzdar. Sebebi, bıýdjettik resýrstardyń oryndalmaýy - ádiletsiz», - dep qadap aıtty K.Másimov.
