Úkimet basshysy bos jatqan jerlerdi ǵaryshtyq monıtorıngpen anyqtaýdy tapsyrdy
«Jaıylym jerlerin aýyldan syrt jaqqa kóshirip, otarlyq mal sharýashylyǵyn damytý kerek, qajet bolsa, jer qorynan ýchaskeler bergen jón. Shalǵaıdaǵy jerlerdi sýmen qamtý máselesin jergilikti bıýdjetterdiń múmkindikterin paıdalana otyryp sheshý qajet. Al jer qory shekteýli aýdandarda ákimdikter jeke qojalyqtardy kooperatıvterge biriktirip, maldy qolda ustaý máselesin pysyqtaýy kerek», - dedi Premer-Mınıstr Úkimettiń búgingi otyrysynda.
Jalpy óńir ákimderi jaıylym máselesin, onyń ishinde qaıtarylǵan jerlerdi bólýdi erekshe baqylaýǵa ustaý qajet.
«Aýyl sharýashylyǵy mınıstrligi qaıtarylǵan jerlerdi bólý monıtorıngi kartasyn ýaqytyly iske qossyn. Aýyl sharýashylyǵy jáne Tsıfrlyq damý mınıstrlikteri ǵaryshtyq monıtorıngti qoldanyp, bos jatqan jáne maqsatsyz paıdalanylǵan jerlerdiń bar-joǵyn baǵalasyn. Ol úshin jerdi utymdy paıdalaný monıtorınginiń «JerInSpectr» platformasyn engizý jumystaryn kúsheıtý qajet», - dedi Á. Smaıylov.
Aıta keteıik, Qazaqstannyń 15 oblysynda mal jaıý úshin 8,9 mln gektar jer jetispeıdi. Bul kóbinese jeke qosalqy sharýashylyqtarda mal sanynyń aıtarlyqtaı ósýine baılanysty.
Ótken jyly paıdalanylmaı jatqan 5,2 mln gektar jer memleketke qaıtaryldy, 2023 jyldyń sońyna deıin taǵy 5 mln gektar jerge shara qoldanylady.
Sondaı-aq Qazaqstanda jer paıdalanýshylardyń nemquraılyǵynan 90 mln gektar aýmaq erozııaǵa ushyrady jáne onyń 29,3 mln gektary iske jaramsyz.
