Úkimet basshysy «Bolashaq» baǵdarlamasy túlekterin jumyspen qamtýdyń keshendi is-sharalaryn qabyldaýdy tapsyrdy
«Biz búgin rasynda mańyzdy máseleni talqyladyq. Baǵdarlamany iske asyrýdyń aldaǵy baǵyt-baǵdaryn aıqyndadyq»,-dedi S. Ahmetov búgin QR Prezıdentiniń «Bolashaq» halyqaralyq baǵdarlamasyn iske asyrýdyń qorytyndylary talqylanǵan Úkimet otyrysynda.
Premer-Mınıstrdiń paıymynsha, «Bolashaq» baǵdarlamasyn taǵaıyndaý Elbasynyń tarıhı sheshimi. Qazaqstannyń bilim berý salasyndaǵy úlken jetistigi. Búginde «Bolashaqtyń» myńdaǵan túlegi el ekonomıkasynyń ártúrli salalarynda eńbek etýde. Sondyqtan da sapaly bilim alamyn degen daryndy jastarǵa qoldaý jalǵasa beretinin basa aıtqan S. Ahmetov: «Bilim jáne ǵylym mınıstrligi tıisti memlekettik organdarmen birlesip «Bolashaq» baǵdarlamasynyń túlekterin jumyspen qamtý boıynsha keshendi is-sharalar qabyldasyn. Ortalyq jáne jergilikti atqarýshy organdarǵa ekonomıkanyń damý basymdyqtarynyń eńbek jáne eńbek naryǵynyń naqty qajettiligin eskere otyryp, shetelge kadrlardy daıarlaý josparyn jasaýdy tapsyramyn»,-dedi.
