Úkimet basshysy BQO-daǵy azyq-túlik shyǵaratyn iri kásiporynǵa bardy
ASTANA. QazAqparat - QR Premer-Mınıstri Baqytjan Saǵyntaev Batys Qazaqstan oblysyna jumys sapary barysynda óńirdegi et ónimderin shyǵaratyn iri kásiporyndardyń biriniń jumysymen tanysty, dep habarlaıdy primeminister.kz.
Nysandy aralaý barysynda QR Premer-Mınıstri óndiristik korpýs pen daıyn ónim bólimimen tanysty jáne azyq-túlik ónimderin shyǵarýda qoldanylatyn tehnologııalar týraly baıandamany tyńdady.
«Jaıyq et» kásipornynyń negizi 2003 jyly burynǵy Oral et kombınaty bazasynda qalanǵan. 2009 jyly munda óndiristiń kólemdi jańǵyrtý jumystary bastalǵan, ol 2013 jyly aıaqtalǵan. Qazirgi tańda zaýyt 100-den astam et shujyq jáne konservi ónimderin shyǵarady.
Aıta ketý kerek, kásiporynnyń tek qana ishki naryqty óz ónimimen qamtamasyz etýden ózge, taıaý shetelge eksportqa shyǵaryp, oblys ekonomıkasyna oń yqpal ete alatyndaı múmkindikteri bar.
Sondaı-aq Baqytjan Saǵyntaev óńirdegi iri jıhaz fabrıkalarynyń birinde boldy.
Nysandy aralaý kezinde QR Premer-Mınıstrine kásiporyn jumysy týraly baıandalyp, daıyn ónimderdiń úlgileri kórsetildi.
Aıta ketý kerek, «Kvant» jıhaz fabrıkasy 1996 jyldan bastap jumys istep keledi jáne osy ýaqyt aralyǵynda shaǵyn óndiris ornynan Qazaqstannyń kóptegen aımaqtaryna tanymal, shıraq damýshy fırmaǵa aınaldy.
2015 jyly Indýstrııalandyrý kartasy aıasynda kompanııa jalpy aýdany 10 000 sharshy metr bolatyn korpýstyq jıhaz shyǵaratyn jańa fabrıka ashty. Munda jıhazdy ónimniń joǵary sapasyn qamtamasyz etetin, aldyńǵy qatarly tehnologııalar qoldanylǵan zamanaýı jabdyqpen ázirleıdi.
Aıta ketý kerek, mundaı kásiporyndardy qurý men damytý Qazaqstannyń ekonomıkalyq ósimin nyǵaıtýǵa qomaqty úles qosa alady, sebebi bul kásiporyndar «qarapaıym zattar ekonomıkasynyń» ókilderi bolyp tabylady. ıAǵnı, halyq arasynda keńinen suranysqa ıe, kúrdeli tehnologııalyq sheshimderdi qajet etpeıtin ónimderdi týdyrady.
Úkimet óz tarapynan, QR Prezıdentiniń Joldaýyn iske asyrý aıasynda osyndaı kásiporyndardy iske qosý men olarǵa qoldaý kórsetý úshin qolaıly jaǵdaılar týdyrýǵa erekshe kóńil bóledi.
