Úkimet basshysy bıznesti baqylaý-qadaǵalaý qyzmetterine tekserý júrgizýdi tapsyrdy
ASTANA. QazAqparat - Bıznesti tekserýshi organdardyń sanyn qysqartý qajet. Bul týraly búgin Úkimettiń kezekten tys otyrysynda Premer-Mınıstri Baqytjan Saǵyntaev málim etti, dep habarlaıdy QazAqparat.
«Keshe respýblıkada baqylaý-qadaǵalaý qyzmetin 61 vedomstvo júrgizetindigi aıtyldy. Onyń 45-i - ortalyq mekeme. Kásipkerlerge 28 myńnan astam talap qoıylady. Osyǵan oraı 1 aıdyń ishinde Ulttyq ekonomıka mınıstrligine múddeli memlekettik organdarmen jáne «Atameken» ulttyq kásipkerler palatasymen birlesip, barlyq baqylaý-qadaǵalaý qyzmetterine revızııa júrgizip, Úkimetke usynys engizýdi tapsyramyn», - dedi Saǵyntaev.
Osy rette Úkimet basshysy eń aldymen bızneske qoıylyp otyrǵan óte joǵary talaptar men ákimshilik kedergilerdi qysqartý qajettigin eskertti.
«Zańnamalyq aktilerge barlyq ózgertýlerdi osy jyldyń ishinde qabyldaý qajet. Sonymen qatar tekserýshi organdarynyń sanyn qysqartýǵa qatysty da usynys engizilýi tıis», - dedi ol.
