Úkimet basshysy birqatar əkimderdiń jumysyn synǵa aldy
Úkimet basshysynyń aıtýynsha, Qyzylorda oblysy respýblıkalyq bıýdjette bólingen qarjynyń 2,9 mlrd teńgesin ıgermegen.
Oblys basshysy Qyrymbek Kósherbaevtyń baıandaýynsha, 2018 jyldyń 8 aıynyń qorytyndysy boıynsha respýblıkalyq bıýdjet qarajattary 90 paıyzǵa ıgerilgen. Igerilmegen soma 2,9 mlrd teńgeni quraıdy.
«Kólik-ınfraqurylymnyń basym jobalary boıynsha 15 jobanyń 900 mln teńgesi ıgerilgen joq. Aptanyń sońyna deıin kelisimge otyryp, qazynashylyqqa tirkeledi. Igerý jaǵynan problema bolmaıdy. Kelesi turǵyn úı qurylysy boıynsha 725 mln teńge konkýrstardyń birneshe ret jarııalanýyna baılanysty ıgerilmegen bolatyn. Qarjy tolyǵymen ıgerildi. Jergilikti ınfraqurylym boıynsha 675 mln teńge sot protsesterine baılanysty ıgerilmedi. Eki nysan boıynsha sot sheshimi shyqty, 13 jáne 20 qyrkúıekte kúshine enedi. Merdigerlermen kelisip qarjyny ıgeremiz. Sý jáne káriz boıynsha 590 mln teńge ıgerilmegen bolatyn. Merdigerlermen kezdesip, qarjynyń ıgerilýi jaǵynan esh kúmán joq»,- dedi oblys basshysy Qyrymbek Kósherbaev.
«Qyrymbek Eleýuly, jyldyń sońyna deıin qarjynyń ıgeriletindigine kúmánimiz joq. Biraq, sizder eshqandaı problema joq, qarjyny ıgeremiz deısizder. Bizge ýaqytynda ıgerilgeni kerek. Qarjyny alatyn kezde barlyq ákimshiler «ýaqytynda ıgeremiz, berińizder» deıdi. Al alǵannan keıin satyp alýshylar, merdigerler, taǵy da basqa tolyp jatqan kemshilikterdi aıta bastaımyz», - dep atap ótti Premer-Mınıstr.
Úkimet basshysynyń dereginshe, Túrkistan oblysy da 1,9 mlrd teńgeni ıgere almaǵan.
«Jalpy jergilikti bıýdjettiń kirister jospary 109,7 paıyzǵa oryndalyp, ótken jyldyń osyndaı kezeńmen salystyrǵanda 7,3 mlrd teńge artyq tústi, ıaǵnı 1,5 mlrd teńgege artyp otyr. Al ıgerilmeýge baılanysty 2 mlrd teńge Shymkent qalasy boıynsha respýblıkalyq jáne oblystyq bıýdjetten qaralǵan nysanaly transferttiń esebinen quralyp otyr. Bul qarjylar respýblıkalyq bıýdjetke tıisti ózgerister engizilgen soń bizdiń bıýdjetten qysqartylyp, Shymkent qalasynyń bıýdjetine aýystyrylatyn bolady. Qalǵan bóliginde jyl sońyna deıin ózimizdiń sýbektıvti sebepterimizge baılanysty shara qoldanamyz. Igeremiz de sóz beremiz»,- dedi Túrkistan oblysynyń ákimi Janseıit Túımebaev.
«Janseıit Qanseıituly, qazir Túrkistan oblysynyń qurylǵany týraly sheshim qabyldanyp, jumysqa kirisip kettińizder. Elbasynyń tapsyrmasy boıynsha qosymsha qarajat bólinedi. Qazirdiń ózinde Úkimet rezervinen qarjy bólinip jatyr. Osynyń barlyǵy ýaqytynda ıgerilýi kerek. Bul óte úlken mańyzdy shara. Osyǵan basa kóńil aýdaryńyz», - dep eskertti Úkimet basshysy.
Baqytjan Saǵyntaevtyń dereginshe, Almaty qalasy da qomaqty qarjy ıgere almaǵan.
Osy máselege qatysty jaýap bergen qala basshysy Baýyrjan Baıbek ıgerilmegen bıýdjet 3,4 mlrd teńgeni quraǵanyn aıtty. 1,3 mlrd teńge jer ýchaskelerin alý boıynsha sotta qaralyp jatyr. Abaı dańǵylyn uzartýǵa 1,1 mlrd teńge qaıta qaralady. 218 mln teńge Ójet aýylynda sý qubyry júıesi boıynsha jumystar keshiktirilgen.
«Qarjy mınıstrligine tapsyrma: Almaty qalasy, basqa óńirler de únemdelgen aqsha, ıgerilmegen qarajat jaıynda aıtyp jatyr. Erbolat Asqarbekuly (Úkimet basshysynyń orynbasary-avt) bıýdjetten qosymsha qarjy surap otyr. Mine qaltalarynda aqshalar bar. Eshqandaı qosymsha qarjynyń qajeti joq, sony alyp jasasyn», - dep eskertti Baqytjan Saǵyntaev Qarjy mınıstri Baqyt Sultanovqa.
Premerdiń dereginshe, Aqmola oblysy 1,4 mlrd teńge ıgermegen.
Máseleni biletindigin aıtqan oblys ákimi Málik Myrzalın «Sebebi merdigerler aýa raıynyń qolaısyzdyǵyna baılanysty jumys kestesinen qalyp keledi. Jyl aıaǵyna deıin barlyǵyn sheshemiz», - dedi.
«Aýa raıy tek Aqmola oblysyna ǵana emes, Soltústik Qazaqstan oblysynda, Qostanaı oblysynda da sondaı. Al biraq, ol óńirlerde qarjy ıgerilip jatyr. Jaýap bergende de qısynyn keltirip jaýap berińiz», - dep eskertti Baqytjan Saǵyntaev.
«Qurmetti áriptesteri ótkende aıtqanmyn, taǵy da qaıtalap aıtamyn. Igerilmegen qarjynyń barlyǵy shuǵyl qajet bolyp otyrǵan salalarǵa ketedi. 6 aıdyń qorytyndysy boıynsha qaraǵanbyz. Qazir de dál sondaı. Bıýdjetti qaıta qaraý kezinde sizderdiń qaraýlaryńyzdan alynatyn bolady»,- dep qosty Úkimet basshysy.
