Úkimet basshysy bilim salasyn synǵa aldy
ASTANA. QazAqparat - Búginde bilim berý baǵdarlamalary boıynsha myńdaǵan mamandar daıarlanady. Alaıda ekonomıkaǵa múldem basqa mamandar qajet, dep xabarlaıdy QazAqparat tilshisi.
«Ashyǵyn aıtý kerek, búginde bilim berý baǵdarlamalary bar. Biraz mamandar daıarlanady. Alaıda el ekonomıkasyna múldem basqa mamandar qajet. Sonda usynys pen suranys sáıkespeıdi. Osy oraıda biz Erlan Kenjeǵalıulymen (bilim mınıstri - avt.) ylǵı daýlasyp qalamyz. Demek, baǵdarlamalar durys emes, ıa bolmasa, bilim berip jatqandar qajetti nárseni bilmeıdi. Ádisteme durys emes pe? Áıteýir, ekonomıkaǵa qajetti kadrlardy daıyndamaımyz», - dedi Úkimet basshysy Baqytjan Saǵyntaev «Atameken» ulttyq kásipkerler palatasynyń V sezinde.
Osy oraıda Premer-Mınıstr Shymkent qalasyndaǵy bir zaýytqa jasaǵan saparyn eske aldy. Sol kezde atalǵan kásiporynnyń aktsıoneri jańadan qurylǵan 600 jumys ornyna 100 mamandy syrttan ákeletinin jetkizdi.
«Men aıtamyn, nege óz mamandarymyzdy almaısyzdar? Ondaı kadrlar joq deıdi. Sonda zaýyt eki jyl salyndy. Eki jylda oǵan qajetti maman daıyndaı almadyq pa? Baılanys jasap, maman daıarlaýǵa bolady ǵoı. Osyǵan baılanysty tıisti tapsyrma berildi. Qazirgi kezde bilim berý baǵdarlamalaryn jańartyp jatyr», - dep atap kórsetti B.Saǵyntaev.
Aıta keteıik, sezd kezinde Úkimet pen «Atameken» UKP arasynda jańa kelisimge qol qoıyldy. Sebebi kelesi aıda besjyldyq kelisimniń merzimi aıaqtalady. Osyǵan baılanysty bılik kásipkerler uıymynyń quramynan shyǵady. Al qazirgi áriptestik jańa kelisimniń negizinde jalǵasady.
«Endi, ózderińiz jaqsy bilesizder, náreste dúnıege kelgende ata-anasy ony álpeshtep ósiredi. Aıaǵyna turǵansha qamqorlyq jasaıdy. Al aıaǵyna turyp ketken balanyń túısigi bolsa, ol ata-anasyna qamqorlyq jasaıdy, ózine tirek bolady. «Atameken» bes jyldyń ishinde jyldap emes, kúnde ósti. Bes jylda júrip ótken jolyn qarańyzdar. Búginde «Atameken» Úkimettiń tiregine aınaldy. Bes jyl ótti. Endi, biz óz ókilettigimizdi toqtatyp, qazaqsha aıtqanda «Atamekenniń» enshisin bólip berip, úlken jolǵa shyǵaryp otyrmyz. Bizdiń aıtarymyz, aq jol!», - dedi QR Premer-Mınıstri Baqytjan Saǵyntaev.
Sondaı-aq, sezd delegattary shaǵyn jáne orta bıznesti jarna tóleýden taǵy úsh jylǵa bosatty.
