Úkimet basshysy bıdaı tasıtyn jabyq vagondardy dıqandarǵa jetkizýdi tapsyrdy
ASTANA. QazAqparat - QR Premer-Mınıstri Baqytjan Saǵyntaev dıqandardyń bıdaı tasıtyn jabyq vagondarǵa degen suranystaryn qanaǵattandyrýdy tapsyrdy, dep habarlaıdy QazAqparat tilshisi.
«Búgingi tańda Ońtústik, Batys jáne Shyǵys óńirleri egin oraǵyna kiristi. Soltústik óńirlerde birqatar jumystar bastalyp jatyr. Degenmen, soltústiktegi astyqty óńirlerge jańbyr kedergi keltirýi múmkin. Jańbyrdyń jaýǵan deńgeıin qazir ákimder aıtyp otyr. Sondaı-aq, aýyl sharýashylyǵy daqyldarynyń ylǵaldylyǵy da joǵary bolady dep kútilýde. Bizdegi aýa-raıynyń ereksheligin eskeretin bolsaq, onda egin jınaý jumystarynyń aıaqtalýyna az qaldy. Osyǵan baılanysty oblys ákimderin egin orý jumystaryn der kezinde júrgizý úshin qajetti uıymdastyrý jumystaryn qabyldaýdy tapsyramyn», - dedi Baqytjan Saǵyntaev Úkimet otyrysynda.
Premer-Mınıstr bıylǵy astyqty qabyldap, keptiretin elevatorlar men kókónis saqtaý qoımalarynyń tehnıkalyq jaraqtandyrylýyn erekshe baqylaýǵa alýdy da umyt qaldyrmaý kerektigin atap ótti.
«Energetıka mınıstrligi egin orý naýqany barysynda aýyl sharýashylyǵy taýaryn óndirýshiler men munaı ónimderin ótkizýde basymdyq alatynyn taǵy bir eske salamyn. Egin orý jumystarynyń aıaǵyna deıin oblystardyń munaı óńdeý zaýyttarynyń bekitilgen kestesine sáıkes, dızel otynymen turaqty túrde qamtamasyz etýdi baqylaýǵa alý qajet. QR IDM aýyl sharýashylyǵy ónimderiniń eksportynyń keńeıýin eskere otyryp, dıqandardyń jabyq vagondarǵa degen suranystaryn qanaǵattandyrý úshin is-sharalardy qabyldaýdy tapsyramyn. Asqar Uzaqbaıuly (Mamın - avt.) vagondardyń máselesin siz de baqylaýǵa alyńyz. Aýyl sharýashylyǵy mınıstrligine egin oraǵynyń táýliktik monıtorıngin uıymdastyrýdy tapsyramyn», - dedi Baqytjan Saǵyntaev.
