Úkimet basshysy «BAYAN kompanııasynyń» tehnologııalyq úderisimen tanysty
ASTANA. QazAqparat - Búgin Qaraǵandy oblysyna jumys sapary barysynda QR Premer-Mınıstri Baqytjan Saǵyntaev Jezqazǵanda kásipkerlikti memlekettik qoldaý aıasynda júzege asyrylǵan «BAYAN kompanııasy» JShS mamandandyrylǵan ónimder shyǵaratyn óndiristik kásipornyna bardy. Bul týraly primeminister.kz habarlaıdy.
Baqytjan Saǵyntaev obektide azyq-túlik ónimderin óndirý boıynsha tehnologııalyq jeliler jumysymen tanysty. Sondaı-aq, Premer-Mınıstrge kásiporynnyń ǵylymı ázirlemeleri týraly baıandalyp, osynda shyǵarylatyn ónimderdiń suryptalymy tanystyryldy.
«BAYAN kompanııasy» JShS bas dırektory Á. Ysqaqova kásiporynnyń óndiristik qýattylyǵy 150 mln teńgeden astam somaǵa, jylyna 143,5 tonna ónimdi quraıtynyn málimdedi. Zaýytta irimshik jáne qyshqyl sút ónimderi, shyryndar, sarysýly sýsyndar men ishetin ıogýrtter shyǵarylady.
Ónimder tústi metallýrgııa kásiporyndarynyń óndiris alańdaryna, Jezqazǵan men Sátpaevtyń saýda oryndaryna, sondaı-aq Reseı Federatsııasynyń naryǵyna (Irkýtsk, Krasnoıarsk, Omby, Barnaýl, Novoaltaısk) jetkiziledi.
Anyqtama: «BAYAN» mamandandyrylǵan azyq-túlik ónimderin shyǵaratyn tsehy 2015 jyly Qaraǵandy oblysynyń Kásipkerlikti qoldaý kartasy aıasynda paıdalanýǵa berildi. Jalpy alǵanda oblysta Kásipkerlikti qoldaý kartasy aıasynda jalpy 771,4 mlrd teńge somasyna 11 520 jumys ornyn ashýmen 103 joba iske asyrylyp jatyr. Búgingi tańda 84 joba júzege asyrylyp, ınvestıtsııalardyń jalpy kólemi 252,1 mlrd teńgeni quraǵan. Kásiporyndarda 6432 jumys orny ashylǵan.
