Úkimet basshysy: Bankterdiń nesıe bólý kólemi 65 paıyzǵa ulǵaıtylady

ASTANA. QazAqparat – Bankterdiń nesıe bólý kólemi aldaǵy 5 jylda 65 paıyzǵa artady. Bul týraly Senattyń jalpy otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Memlekettik qoldaý jumystaryna toqtalsaq, kelesi jyly bıylmen salystyrǵanda naqty sektordy qoldaýǵa jumsalatyn shyǵystardyń birshama azaıýy bolady. Buǵan naqty sektordy qoldaýǵa jumsalatyn shyǵyndardyń bir bóligin jergilikti bıýdjetterge shamamen jarty trıllıon teńge aýdarýymyz sebep bolyp otyr», - dedi Á. Smaıylov depýtattardyń suraǵyna jaýap bere otyryp.

Onyń aıtýynsha, bul rette Úkimet jyl saıyn bıýdjetterdi qalyptastyrý barysynda naqty sektordy qoldaý sharalaryn qarjylandyrýdy ulǵaıtyp, ony jalpy ishki ónimniń 3-3,5 paıyzynan kem emes deńgeıde ustap turatyn bolady.

«Ekonomıkaǵa nesıe bólý týraly aıtatyn bolsaq, makroekonomıkalyq jaǵdaıdyń turaqtanýyna qaraı bankterdiń nesıe bólý kólemin bıylǵy 22 trıllıon teńgeden 2027 jylǵa qaraı 36 trıllıon teńgege deıin, ıaǵnı bes jyl ishinde 65 paıyzǵa ulǵaıtý josparlanyp otyr», - dedi Premer-Mınıstr.

Budan buryn habarlanǵandaı, Á. Smaıylov jańa jobalardy júzege asyrý ónerkásip óniminiń kólemin 10,5 trln teńgege arttyrýǵa múmkindik beretinin aıtty. Shamamen 4,4 trıllıon teńgege ımportty almastyrý júrgiziledi jáne 6,1 trln teńgege eksport kólemi ósedi.