Úkimet basshysy balyq sharýashylyǵyn damytý baǵytynda birneshe mınıstrlikke tapsyrma berdi

NUR-SULTAN. QazAqparat - QR Premer-Mınıstri Asqar Mamın búgin ótken Úkimet otyrysynda balyq sharýashylyǵyn damytý úshin birqatar mınıstrlikke tapsyrma berdi, dep habarlaıdy QazAqparat tilshisi.

«Oblystardyń ákimdikteri Ekologııa mınıstrligimen birge ázirlengen balyq ósirýdi aımaqtandyrý shemasyn eskere otyryp, bıylǵy 1 qarashaǵa deıin basym sýbsıdııalaý, jer ýchaskelerin bólý, ınfraqurylymdy júrgizý boıynsha naqty ındıkatorlar men is-sharalardy jáne jergilikti jerlerdegi basqa memlekettik qoldaý sharalaryn kórsete otyryp, balyq sharýashylyǵyn damytýdyń óńirlik baǵdarlamalaryn ázirlesin jáne bekitsin», - dep atap ótti Úkimet basshysy.

Sondaı-aq, ol Ekologııa mınıstrligine múddeli memlekettik organdarmen birge bir aı merzimde bıznes qoǵamdastyqtarmen balyq sharýashylyǵy salasyn sýbsıdııalaýdy keńeıtý jónindegi usynystardy pysyqtaý jáne kelisilgen usynystardy Úkimetke engizý týraly tapsyrma berdi.

Sondaı-aq Asqar Mamın «Bilim jáne ǵylym mınıstrligimen birge joǵary oqý oryndarynyń oqý jáne tájirıbelik baǵdarlamalaryn qaıta qarap, balyq ósirýge basa nazar aýdarý qajet. Sonymen qatar, Qarjy mınıstrligi bıznestiń búgin aıtylǵan usynystaryn eskere otyryp, Saýda mınıstrligimen birge shetelden balyqtyń baǵaly túrleriniń balyq ósirý materıalyn jetkizýdi jáne olardy tasymaldaý kezinde shekarada baqylaýdyń barlyq túrlerinen ótýdi rásimdeýdi ońaılatý jóninde usynystardy pysyqtaýdy» tapsyrdy.