Úkimet basshysy balyq sharýashylyǵy boıynsha birqatar tapsyrma berdi
«El ekonomıkasynda tez damyp kele jatqan salanyń biri – balyq sharýashylyǵy. Sońǵy 3 jylda balyqty qoldan ósirý kólemi 2 ese kóbeıdi. Buǵan ótken jyly qabyldanǵan Balyq sharýashylyǵyn damytý baǵdarlamasy aıtarlyqtaı serpin berdi. Salany memlekettik qoldaý is-sharalary kúsheıtildi, onyń ishinde qajetti azyq qoryn ulǵaıtýǵa kóńil bólindi. Balyq ósirýge arnalǵan toǵandardy jobalaý rásimderi jeńildetildi. Salyq kodeksi aıasynda balyq kásipshiligine qosylǵan qun salyǵyn 70 paıyzǵa tómendetý kózdeldi», - dedi Álıhan Smaıylov Úkimet otyrysynda.
Onyń dereginshe, qabyldanǵan is-sharalardyń arqasynda sońǵy 2 jylda balyq ósiretin sharýashylyqtardyń sany 2 ese ósti. Balyq eksporty 13 paıyzǵa ulǵaıdy. Eýropa elderine de eksporttaýdamyz. Qoldan ósirilgen jáne aýlanǵan balyq óndirisi bıyl 10 aıda shamamen 57 myń tonna boldy. Bul ótken jylǵy kórsetkishten 12 paıyzǵa joǵary.
«Degenmen, biz áli kúnge deıin óz naryǵymyzdy otandyq balyqpen tolyq qamtamasyz ete almaı kelemiz. Importtyń úlesi áli de joǵary. Keıbir óńirler baǵdarlamadaǵy josparly kórsetkishterdi qamtamasyz ete almaı otyr. Balyq ósirý kórsetkishi eń tómen óńirdiń ishinde Atyraý oblysy da bar. Sonymen qatar Qaraǵandy, Almaty jáne Pavlodar oblystarynda da balyq óndirisi tómen. Atalǵan óńir ákimdikteri josparlanǵan kórsetkishterge qol jetkizý boıynsha jumysty kúsheıtip, bıznestiń bastamalaryna qoldaý kórsetýi qajet», - dedi ol.
Premer-Mınıstr kásipkerlerdi balyq ónimderin tereń óńdeýge yntalandyrý, tıisti memlekettik qoldaý sharalaryn akvaósirý jónindegi zań jobasy aıasynda eskerý, tabıǵı sý qoımalaryndaǵy balyq qorynyń kóbeıýine nazar aýdar qajettigin basa aıtty.
«Birinshi, óńir ákimdikteri balyq sharýashylyǵy salasyna ınvestıtsııalar tartý jumysyn kúsheıtýi qajet. Balyq ósiretin sharýashylyqtardy uıymdastyrý úshin ýchaskelerdi berý rásimin jeńildetý asa mańyzdy. Ekinshi, Saýda mınıstrligi óńir ákimdikterimen birlesip, otandyq balyq ónimderin satatyn arnaýly obektiler qurý máselesin pysyqtasyn. Jergilikti ónimge suranysty arttyrý úshin jaǵdaı jasaýǵa tıispiz. Úshinshi, Memleket basshysy Atyraý oblysyndaǵy memlekettik bekire zaýyttarynyń tehnıkalyq jaǵdaıyn jaqsartý qajettiligin erekshe atap ótti. Sondyqtan Ekologııa, Indýstrııa mınıstrlikteri men oblys ákimdigi osy zaýyttardy rekonstrýktsııalaýdy bıýdjettik ınvestıtsııalyq jobalar tizbesine engizý máselesin pysyqtasyn», - dedi Álıhan Smaıylov.
Foto: primeminister.kz
