Úkimet basshysy aýyl sharýashylyǵyn sýbsıdııalaýdy azyq-túlik taýarlarynyń baǵasyn arzandatý sharalarymen baılanystyrýdy tapsyrdy
ANA. 10 naýryz. QazAqparat /Rýslan Ǵabbasov/ - Úkimet basshysy Kárim Másimov Aýyl sharýashylyǵy mınıstri Aqylbek Kúrishbaevqa aýylsharýashylyq taýaryn óndirýshilerdi sýbsıdııalaýdy azyq-túlik taýarlarynyń baǵasyn arzandatý sharalarymen baılanystyrýdy júktedi.
Bundaı tapsyrmany Premer-Mınıstr búgin kóktemgi egis naýqanyna arnalǵan Úkimet otyrysynda júktedi.
K. Másimovtyń paıymdaýynsha, aýylsharýashylyq taýarlaryn óndirýshiler úshin dızel otynynyń arzandatylýy jáne sýbsıdııalaý sharalary tikeleı azyq-túlik taýarlarynyń baǵasymen baılanysty bolýy tıis. «Atap aıtqanda, osy turǵyda biz tıisti nátıjege qol jetkizýimiz qajet»,-dep túıindedi Premr-Mınıstr.
Aıta keteıik, búgin Úkimet otyrysynda málim bolǵanyndaı, aýylsharýashylyq taýaryn óndirýshilerge dızel otyny 68 teńgeden jetkiziledi. Munaı jáne gaz mınıstri Saýat Myńbaevtyń sózine qaraǵanda, 68 teńge bul tutynýshylarǵa jetkiziletin eń sońǵy baǵa. «Bólshek naryǵynda dızel otynynyń baǵasy qazirgi kezde 76 teńgeni qurap otyr. Atap aıtqanda, bólshek saýdamen salystyrǵanda 11 paıyz deńgeıinde jeńildik jasalatyn bolady»,-dedi S. Myńbaev.
