Úkimet basshysy Aýyl sharýashylyǵy mınıstrine alqa májilisin nashar uıymdastyrǵany úshin eskertý jasady
ASTANA. 5 aqpan. QazAqparat - Búgin Úkimettiń selektorlyq rejımdegi otyrysynda QR Premer-Mınıstri Serik Ahmetov Aýyl sharýashylyǵy mınıstri Asyljan Mamytbekovke vedomstvonyń alqa májilisin nashar uıymdastyrǵany úshin eskertý jasady.
«Keshe biz Aýyl sharýashylyǵy mınıstrliginiń keńeıtilgen alqa májilisinde 2020 jylǵa deıin agroónerkásip keshenin damytý baǵdarlamasynyń jobasyn qarastyrdyq. Mundaı jyldyq keńeste, ásirese bizdiń halqymyzdyń shamamen jartysyna qatysty salalyq jıynda ákimder qatysýy tıis edi. Buǵan qosa biz alqany selektorlyq rejımde ótkizdik. Oblystardyń, ásirese aýyl sharýashylyqty óńirlerdiń birde bir ákimi qatysqan joq. Uıymdastyrylýy boıynsha mınıstrlikke eskertý jasaımyn», - dedi Úkimet basshysy.
S.Ahmetovtiń paıymynsha, mundaı jıyndarda ákimderdiń ózderi bastamashy bolyp qatysýy qajet. Sonymen qatar ol 12 aqpanda Úkimet otyrysynda baǵdarlama jobasy qarastyrylatyn eske salyp ótti.
«Biz Úkimette 2012 jyl boıy ázirlengen mańyzdy baǵdarlamany qarastyryp, qabyldaıtyn bolamyz. Ásirese, óńirlerden kóptegen usynystar boldy. Aýyl sharýashylyǵy mınıstri men birinshi vıtse-permer B.Saǵyntaevqa qandaı da bir sátti jiberip almaý úshin osy aptada barynsha tyńǵylyqty jumys isteýdi ótinemin», - dedi Premer-Mınıstr.
