Úkimet basshysy astyqty dıqandardan joǵary baǵamen satyp alýdy tapsyrdy
ASTANA. QazAqparat - Búginde astyqtyń baǵasy kúrt tómendep ketti. Sonyń saldarynan sharýalar shyǵynǵa batyp jatyr. Búgin QR Premer-Mınıstri Baqytjan Saǵyntaev astyqty joǵary baǵamen satyp alýǵa tapsyrma berdi, dep xabarlaıdy QazAqparat tilshisi.
QR Aýyl sharýashylyǵy vıtse-mınıstri Qaırat Aıtýǵanovtyń aıtýynsha, qyrkúıek aıynan bastap ishki naryqta astyqtyń baǵasy tómendep ketti. Sebebi suranys joq. Oǵan birneshe faktor áser etti. "Birinshiden, bıyl Reseıde astyqtyń rekordtyq kólemi jınaldy. Sodan Qazaqstanmen shekaralas aımaqtarda arzan astyq kóbeıip, zańsyz jolmen tasymaldana bastady. Ekinshiden, vagondardyń tapshylyǵy ózekti bolyp tur. Vagon jetispegennen keıin xalyqaralyq treıderlerdiń talaptary oryndalmaıdy. Úshinshiden, Azyq-túlik korporatsııasy sylbyr qımyldap jatyr. Atalǵan kompanııa basynda bir tonna astyqtyń baǵasyn 42 myń dep qoısa, artynan 39 myńǵa túsirdi. Osynyń barlyǵy suranystyń tómendep, astyqtyń kúrt arzandaýyna ákelip soqtyrdy", - dedi Q. Aıtýǵanov Úkimettiń búgingi otyrysynda.
Onyń aıtýynsha, qazirgi kezde dıqandar astyqty burynǵy baǵamen ótkize almaı otyr. Al tabys bolmaǵannan keıin nesıelerdi jabý múmkin emes. Osyǵan baılanysty Azyq-túlik korporatsııasy arqyly 2 mln tonna kólemindegi astyqty satyp alý qajet. Bir tonnanyń baǵasy 42 myń teńge bolýy shart. Astyqty satyp alý sharalaryn baqylaýdy arnaıy komıssııalarǵa júkteý kerek. Onyń quramynda jergilikti bılik qana emes, xalyq pen bıznes ókilderi de bolýy qajet. Budan bólek, kórshi Reseıden astyqty zańsyz tasymaldaýǵa tosqaýyl qoıý qajet.
Atalǵan usynysty Qazaqstan fermerler odaǵy da qoldap otyr. "Bizge Úkimettiń qoldaýy aýadaı qajet. Astyqtyń baǵasy da (tonnasyna - 42 myń teńge) jaqsy qoıylyp otyr. Sebebi dıqandar jalaqyny tóleı almaı jatyr. Texnıkaǵa qajetti qural-jabdyqtar satyp alynbady. Aldaǵy kóktemgi egistik jumystaryna daıyndyq joq deýge bolady. Sondyqtan bul sheshim jańa jylǵa jaqsy syılyq bolatyn edi. Aqshany tezdetip berseńizder, biz de osy jumysqa belsene atsalysamyz. Óıtkeni astyqty teń dárejede satyp alý sııaqty máseleler bar. Reseıden keletin astyqty da satyp jiberýi múmkin. Ondaıǵa jol bermeý kerek", - deıdi uıym basshysy Áýezxan Darynov.
QR Premer-Mınıstri Baqytjan Saǵyntaev Aqmola, Qostanaı men Soltústik Qazaqstannyń ákimderin tyńdap shyqqannan keıin dıqandardyń astyǵyn joǵary baǵamen satyp alýdy qoldady. "Sońǵy bir apta boıy biz osy máseleni kúnde pysyqtap kelemiz. Barlyǵy qoldap otyr. Qarjynyń kózin anyqtadyq. Baǵany 42 myń teńge dep belgiledik. Endi, astyqty satyp alý sharalaryn abyroımen atqaryp shyǵý qajet. Ony jyldam ári ashyq túrde ótkizý kerek. Osyǵan baılanysty oblys ákimderi arnaıy shtabtardy qursyn. Oǵan ákimdik qyzmetkerlerin ǵana emes "Atameken" palatasy men Qazaqstannyń fermerleri odaǵyn da tartý qajet. Aqsha adresatqa jetýi tıis. Darynov myrza aıtqandaı, Reseıdiń astyǵyna, ıa bolmasa bir qolǵa ketip qalmasyn. Sondyqtan osy máseleni qatań baqylaýda ustańyzdar", - dep atap kórsetti Úkimet basshysy.
