Úkimet basshysy Astanada ótetin EQYU Sammıti men Qysqy Azııada oıyndary kezinde 4G standartyndaǵy júıeni iske qosýdy tapsyrdy
ASTANA. Qazannyń 26-sy. QazAqparat /Rýslan Ǵabbasov/ - Úkimet basshysy Kárim Másimov aldaǵy jeltoqsannyń 1-2-si kúnderi Astanada ótetin EQYU Sammıti jáne 2011 jyly Astana men Almatyda bolatyn VII Qysqy Azııa oıyndary kezinde 4G standartyndaǵy júıeni iske qosýdy tapsyrdy. Bul tapsyrmany Premer-Mınıstr búgin Astanada 4G ilki jobasyn iske qosýǵa arnalǵan beıne konferentsııa barysynda júktedi.
Premer-Mınıstr Baılanys jáne aqparat mınıstrligine atalǵan másele boıynsha aldaǵy aptada Úkimette arnaıy otyrysty daıarlaýdy tapsyrdy. «Atalǵan ilki jobany EQYU Sammıti men Azıadany ótkizý kezinde, ıaǵnı qańtardyń aıaǵyna deıingi merzimde uzartýǵa múmkin bola ma? Osy oraıda barlyq qajetti sheshimderdi ázirleńizder»,-dedi Úkimet basshysy.
Sonymen qatar K. Másimov respýblıka boıynsha LTE tehnologııasyna kóshý máselesine toqtaldy. «Sebebi, biz 3G tehnologııasymen shamaly kesheýildep qaldyq. Bir jaǵynan alyp qaraǵanda bul jaman, al ekinshi jaǵynan qarasaq - bul bizge 3G arqyly birden LTE júıesine kóshýge múmkindik beredi»,-dedi Úkimet basshysy.
Óz kezeginde Baılanys jáne aqparat mınıstri Asqar Jumaǵalıev bul tehnolgııa jumys isteý úshin ózine qarasty vedomstvo Qorǵanys mınıstrligimen tıisti máselelerdi qarastyryp jatqandyǵyn jetkizdi. «Aýyldy jerler úshin biz keń jolaqty ınternetti ornatý turǵysyndaǵy jumystardy atqarýdamyz jáne osyǵan 3G tehnologııasyn paıdalanýdy jobalap otyrmyz»,-dedi mınıstr.
Sonymen qatar A. Jumaǵalıev bıylǵy jeltoqsannan bastap K-cell jáne K-mobil kompanııalarymen birlese Astana men Almaty jurtyshylyǵyn, sondaı-aq EQYU sammıti men Azıadany 3G tehnologııalarymen qamtamasyz etý múmkindigi bolatyn atap ótti.
Aıta keteıik, LTE jelisi ilki jobalyq rejımde búginde Almatynyń ortalyq aýdandaryn qamtıdy. Búgin, qazannyń 26-sy kúni Alcatel-Lucent kompanııasy men (Euronext Paris ı NYSE: ALU) «Vympelkom Ltd.» (NYSE: VIP) tobyna kiretin, Qazaqstanda óz qyzmetterin Beeline saýda belgisimen usynatyn - «KaR-Tel» JShS kompanııasy, post keńestik keńistikte 700 MGts jıilik dıapazonynda jumys isteıtin tuńǵysh LTE jelisin iske qosqanyn jarııa etti. Alcatel-Lucent jańa jeli úshin jabdyqtardy jetkizýshi bolyp tabylady. LTE jelisi Qazaqstannyń ońtústik astanasy - Almatynyń ortalyq aýdandaryna taratylatyn bolady.
