Úkimet basshysy AShM-ǵa aýa raıyn «syltaýratpaı», jyl saıyn turaqty ónim alýdy tapsyrdy

ASTANA. 12 qarasha. QazAqparat - Qazaqstan Premer-Mınıstri Serik Ahmetov búgin ótken Úkimet otyrysynda QR Aýyl sharýashylyǵy mınıstrliginen aýa raıyn «syltaýratpaı», jyl saıyn turaqty mólsherde ónim alýdy talap etti.

«Jalpy alǵanda ónim az alynǵan joq. Árıne, astyq jınaý kezinde aýa raıy da eleýli áser etedi. Tek sońǵy úsh jyldy alyp qaraǵanda dándi daqyldardyń jalpy túsimi 14-ten 27 mln. tonna aralyǵynda aýytqyp otyrǵan. Sondyqtan Aýyl sharýashylyǵy mınıstrligine agrarlyq ınstıtýttarmen birlese otyryp, jańa tehnologııalar engizý kerek. Onyń nátıjesi, aýa raıynyń qandaı bolǵanyna qaramastan, turaqty mólsherde ónim alý bolýy tıis», - dedi S. Ahmetov.

Onyń aıtýynsha, egis alqaptaryn damytý baıaý júrgizilýde. Sondaı-aq, Úkimet basshysy AShM-ǵa «QazAgromen» jáne oblys ákimderimen birlese otyryp, jınalǵan ónimdi saqtaýǵa, odan ári óz elimizde jáne shetelderde satýǵa sharalar qoldaný qajettigin tapsyrdy.

Sonymen qatar, ol mal sharýashylyǵyn azyq-túlikpen, jem-shóppen qamtamasyz etýge tapsyrma berdi. Sondaı-aq, oblys ákimderine un men áleýmettik nannyń baǵasyn jiti baqylaýda ustap otyrý qajettigin taǵy da bir eske saldy.

«Sonymen qatar, ákimder aýyl sharýashylyq qurylymdaryna astyqtaryn nan óndirý oryndaryna, elevatorlarǵa, saqtaý jáne keptirý oryndaryna aparýǵa atsalysý kerek. Úkimet tarapynan da qoldaý bolady», - dep atap ótti Úkimet basshysy.