Úkimet basshysy «Arselor Mıttaldy» synǵa aldy
"Memleket basshysy ımportty otandyq taýarlarmen barynsha almastyrý mindetin qoıyp otyr. Statıstıkalyq málimetterge sáıkes, 2015 jylmen salystyrǵanda qazaqstandyq qamtýdyń kólemi 8 paıyzǵa azaıdy. Bul neni kórsetedi? Demek, osy saladaǵy jumys báseńdep ketti", - deıdi Saǵyntaev. Onyń aıtýynsha, qazirgi kezde jıhaz ben jeńil ónerkásip ónimderi boıynsha qazaqstandyq qamtýdy ulǵaıtý jumysy qolǵa alynǵan. Alaıda osymen shektelmeý kerek. Bul rette Úkimet basshysy aǵymdaǵy aıdyń aıaǵyna deıi basqa da salalardy zerdelep, buǵan deıngi mexanızmdi qoldaný qajettigin jetkizdi. "Budan bólek, qarjy mınıstrligi memlekettik satyp alýlar kezinde otandyq ónimderdi paıdalaný máselesin jiti baqylaýda ustaýy tıis. Eger bireý ol talaptardy buzatyn bolsa, qatań sharalardy qoldaný qajet", - dep atap kórsetti Premer-Mınıstr.
Osy oraıda Úkimet basshysy tabıǵı monopolııalar salasyndaǵy kompanııalardyń otandyq gazdy, elektr energııasyn jáne taǵy basqa shıkizatty qazaqstandyq ónim dep kórsetkenderine kóńil bólmeý kerek dep sanaıdy. Qazaqstandyq qamtý salasynda naqty taýarlar eskerilýi shart. "Biz kerek kezde iri kompaııalarǵa qoldaý jasaımyz. Demek, olardan da bir qaıtarym bolýy qajet. Ásirese, «Arselor Mıttaldyń» tarapynan ondaı nemquraılyq qatty baıqalady. Úkimetke ylǵı keledi de, preferentsııa alyp ketedi. Ózderi bolsa, qajetti zattardy syrttan satyp alady. Oǵan eshbir daýa joq. Onyń dál janynda - tosqaýyldyń arǵy jaǵynda bir zaýyt bar. Biraq olardyń ónimin almaı, shetelden alyp keledi", - deıdi Saǵyntaev. Osyǵan baılanysty ol barlyq kompanııa basshylaryn jınap, arnaıy keńes ótkizýge tapsyrma berdi.
Aıta keteıik, Premer-Mınıstr bir aptanyń ishinde "Samuryq-Qazyna" qorynyń satyp alýlaryna qatysty biryńǵaı erejelerdi de ázirleýdi tapsyrdy.
