Úkimet basshysy: Árbir azamat MÁMS júıesiniń qalaı jumys isteıtinin naqty bilýi tıis
«Densaýlyq saqtaý júıesin damytýdyń 2025 jylǵa deıingi jańa memlekettik baǵdarlamasy ázirlenýde. Saqtandyrýdy tıimdi túrde engizý úshin 1 qyrkúıekten bastap Qaraǵandy oblysynda pılottyq joba iske qosylady. Osyǵan baılanysty birinshiden, Densaýlyq saqtaý mınıstrligine osy jobany iske qosýdy, barlyq medıtsınalyq uıymdardy qamtamasyz etýdi tapsyramyn. Bul tájirıbeni barlyq óńirlerge taratý jáne kelesi jyldan bastap medıtsınalyq saqtandyrý tolyq iske qosylǵan kezde eskerý qajet. Ekinshiden, barlyq óńirlerdi ákimderine qazan aıyna deıin mindetti áleýmettik-medıtsınalyq saqtandyrý jobasyn júzege asyrýdy qamtamasyz etýdi tapsyramyz», - dedi Asqar Mamın Úkimet otyrysynda.
Premer-mınıstr óz sózinde osy jobalardy daıyndaý aıasynda Atyraý, Mańǵystaý, Pavlodar oblystarynda jumys sapaly túrde uıymdastyrylǵanyn atap ótti.
«Sonymen qatar, Almaty, Aqmola, SQO, Túrkistan oblystarynyń ákimderi medıtsınalyq uıymdardy tehnıkalyq turǵyda qamtamasyz etýge jáne halyqty bastapqy medıtsınalyq-kómek berý uıymdaryna tirkeýge erekshe nazar aýdarýy qajet. Úshinshiden, mınıstrlik pen óńirler mindetti medıtsınalyq-áleýmettik kómek boıynsha aqparattyq túsindirý jumystaryn kúsheıtýi qajet. Árbir azamat memleket tarapynan qandaı medıtsınalyq kómek tegin kórsetiletinin jáne áleýmettik-medıtsınalyq saqtandyrý júıesiniń qalaı jumys isteıtinin naqty bilý tıis. Densaýlyq saqtaý mınıstrligi, Eńbek jáne halyqty áleýmettik qorǵaý mınıstrligine, óńirlerdiń ákimdikterine halyqty medıtsınalyq saqtandyrýmen tolyǵymen qamtý jáne tizimdeý, mártebesin naqtylaý jónindegi barlyq jumysty bıylǵy jyldyń qazan aıynda aıaqtaýdy tapsyramyn. Ýaqyt az qaldy. Barlyq máselelerdi sheshý úshin jumysqa belsene kirisý kerek», - dedi ol.
Asqar Mamın óz sózinde osy máseleni qazan aıynda qaıta qaralatynyn málim etti.
Eske sala ketsek, búgingi Úkimet otyrysynda Densaýlyq saqtaý mınıstri Eljan Birtanov medıtsınalyq kómek kórsetýdiń jańa tásilderin usynǵan bolatyn. Onyń aıtýynsha, bıýdjettik shyǵyndardyń jyl saıyn ulǵaıýyna qaramastan, tegin medıtsınalyq kómekti qarjylandyrýdyń qazirgi deńgeıi halyqtyń medıtsınalyq kómekke ósip kele jatqan suranysyn qamtamasyz ete almaı jatyr. Mınıstrliktiń baǵalaýynsha tegin medıtsınalyq kómekti qarjylyq qamtamasyz etý tapshylyǵy tek 2017 jyly 363 mlrd teńgeni quraǵan.
