Úkimet basshysy Almaty oblysynyń agrarıılerimen problemaly máselelerdi talqylady
Úkimet basshysy agroónerkásip salasyndaǵy birqatar kásiporynnyń jumysymen tanysyp, óńirdiń aýylsharýashylyq qurylymdarynyń jetekshilerimen kezdesti. Birinshi kezekte ınnovatsııalyq tehnologııalardy qoldana otyryp, jemis-jıdekterdi tereń óńdeıtin «Fruit Art» JShS eksporttyq klasterine bardy. Kásiporynnyń ónimi damyǵan elderdiń naryqtaryna (tamaq ónerkásibi jáne bólshek saýda jelileri), sonyń ishinde EO, AQSh, Japonııa jáne Ońtústik Koreıaǵa jetkiziledi.
Álıhan Smaıylov Almaty oblysy qolaıly klımattyq jáne geografııalyq jaǵdaılardyń arqasynda iri agrarlyq ónim óndirýshilerdiń biri bolyp tabylatynyn atap ótti.
Sondaı-aq Premer-Mınıstr oblystyń aýyl sharýashylyǵy qurylymdarynyń basshylarymen kezdesip, sýbsıdııalaý, aınalym qarajatymen qamtamasyz etý, sý jáne gaz kózderin qoljetimdi etý, jem-jóp, veterınarııa preparattary, tuqymdar, tyńaıtqyshtar, pestıtsıdter, gerbıtsıdter, aýyl sharýashylyǵy tehnıkasy jáne taǵy basqasyn satyp alý máselelerin talqylady.
«Sýbsıdııalaý júıesin ózgertip, ónimdilikke tikeleı áser etetin sýbsıdııalardy ǵana qaldyrý josparlanǵan bolatyn. Biraq fermerlermen keńeskennen keıin biz qoldanystaǵy keıbir sýbsıdııalaý standarttaryn saqtap qalý týraly ortaq kelisimge keldik. Óz tarapynan aýyl sharýashylyǵy taýaryn óndirýshiler azamattardy qoljetimdi baǵada sapaly ónimmen qamtamasyz etýge tıis», — dedi Úkimet basshysy.
Sonymen qatar Álıhan Smaıylov aldaǵy jyldary Úkimet sharýalarǵa qajetti sý kólemin jetkizip berý úshin kanaldar men gıdronysandardy salýǵa jáne jańǵyrtýǵa qosymsha qarajat bóletinin aıtty.
Odan keıin Premer-Mınıstr 2022 jyly iske qosylǵan jáne jylyna 15 myńǵa deıin ónim shyǵaratyn «Nauryz Agro KZ» JShS broılerlik qus fabrıkasynyń jumysymen tanysty. Barlyq álemdik standarttarǵa sáıkes keletin kásiporynnyń óz ınkýbatory bar jáne qazirgi ýaqytta et óńdeý tsehynyń qurylysy júrip jatyr.
«Azyq-túlik qaýipsizdigi – búgingi kúnniń basty syn-qaterleriniń biri. Oblys ákimdigi óz ónimderiniń básekege qabilettiligin jáne agroónerkásip keshenindegi jumyspen qamtý deńgeıin arttyrý úshin osyndaı jobalarǵa qoldaý kórsetýi qajet», — dedi mınıstrler kabınetiniń basshysy.
Sonymen qatar Úkimet basshysy tez daıyndalatyn tamaq ónimderin óndirýmen aınalysatyn «Mareven Fýd Tıan-Shan» JShS kásipornyna bardy. Óz ónimderin ishki naryqqa da, jaqyn shet elderge de satyp otyrǵan zaýytta 850 adam jumys isteıdi. Ótken jyly munda alkogolsiz sýsyndardyń jańa jelisi iske qosyldy. Óndiris qýatty jylyna 78 mln bótelkeni (lımonadtar jáne t.b.) qurady. Qosymsha 90 jumys orny quryldy.
Álıhan Smaıylovtyń aıtýynsha, bul zamanaýı zaýyt – sheteldik ınvestıtsııanyń qatysýymen iske asyp jatqan tabysty jobanyń naqty kórinisi.
«Búgingi tańda ónimniń 70% astamy eksportqa jiberiledi, bul óńirdegi tamaq ónerkásibin damytý áleýeti qanshalyqty joǵary ekenin kórsetedi. Osyǵan baılanysty jergilikti bılik jumys istep turǵan kásiporyndardy jańǵyrtý jáne olardy keńeıtý máseleleri boıynsha járdemdesýi qajet», — dedi Premer-Mınıstr.
Foto: primeminister.kz
