Úkimet basshysy aldaǵy mereke kúnderinde kezekshilik uıymdastyrýdy tapsyrdy
ASTANA. Jeltoqsannyń 28-i. QazAqparat /Rýslan Ǵabbasov/ - Búgin Úkimette ótken selektorlyq keńeste Premer-Mınıstr Kárim Másimov barlyq mekemelerge aldaǵy mereke kúnderi kezekshi nemese jaýapty adamdar bekitýdi tapsyrdy,
dep habarlaıdy QazAqparat.
«Men oblys ákimderine jáne jalpy barlyq basshylarǵa osyǵan baılanysty tapsyrma beremin. Aldaǵy uzaq mereke kúnderi bar. Kópshilik el demalysqa shyǵady. Osyǵan oraı jergilikti jerlerde kezekshiler men jaýapty adamdar bekitilýi tıis», dedi K. Másimov.
Úkimet basshysy aýa raıynyń sýyqtyǵyna baılanysty barlyq energııamen qamtamasyz etý nysandarynda árqashan jaýapty adamdar bolýy kerektigin atap ótti.
«Úkimet basshysynyń Keńsesine osy másele boıynsha kezekshilik uıymdastyrýdy tapsyramyn», dedi Premer-Mınıstr. Osyǵan baılanysty bul máseleni ózi qadaǵalaıtynyn jetkizdi. Sonymen birge Úkimet basshysy kópshilikti Jańa jylmen quttyqtaı kele, bıylǵy jyl ońaı bolmaǵanyn, alaıda barlyq qıyndyqtar tıisti deńgeıde ótkerilgenin atap ótti.
