Úkimet basshysy aldaǵy aptada Máskeýge saparlaıdy

ASTANA. QazAqparat - «Proton» zymyran tasyǵyshynyń apatynan kelgen zalaldyń ótemaqysy «Jol kartasy» aıasynda sheshilip jatyr. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Úkimet basshysynyń birinshi orynbasary Baqytjan Saǵyntaev málim etti.

«Ǵarysh máselesine toqtalatyn bolsaq, byltyrǵy jyldyń jeltoqsanynda «Jol kartasyna» qol qoıylǵan bolatyn. Osynyń aıasynda tıisti jumystar júrgizilip jatyr. 15 cáýirde Úkimet basshysy Kárim Másimov Máskeýde óziniń áriptesterimen, ıaǵnı Reseı Premer-Mınıstri Dmıtrıı Medvedevpen jáne Belarýs Úkimet basshysy Mıhaıl Mıasnıkovıchpen kezdesedi. Onda Eýrazııalyq ekonomıkalyq odaq tóńireginde, sondaı-aq atalǵan «Jol kartasy» aıasynda jumystar búginde qandaı jaǵdaıda atqarylyp jatqanyn taldaýǵa usynys jasadyq. Qazirgi kezde osy usynysty Reseı tarapy qabyldady», - dedi birinshi vıtse-premer.

«Al ótemaqyny qashan tóleıdi degen máselege toqtalatyn bolsaq, ol «Jol kartasynyń» tóńireginde qaralyp jatyr», - dep toqtaldy B. Saǵyntaev.

Esterińizge sala keteıik, ótken jylǵy 2 shildede Baıqońyrda «Proton-M» zymyran-tasyǵyshynyń qulaýy saldarynan keltirilgen shyǵyn úshin Qazaqstan tarapy Reseıge ótemaqy tóletý máselesin kótergen bolatyn.

Sonymen qatar 2013 jyldyń aıaǵynda «Baıqońyr» keshenin birlesip paıdalaný týraly «Jol kartasy» qabyldanǵan edi.

«Atap aıtqanda, bul qujat Reseıge qaraǵanda negizinen bizge qajettirek. Ondaǵy 26 tarmaqtyń ishinde 24-i Qazaqstannyń múddesine arnalǵan. Osy oraıda bıyl biz 22 tarmaqty mindetti túrde oryndaýymyz kerek, al bunyń 8 tarmaǵy birinshi toqsanda iske asyrylýy tıis», - dep naqtylap ótken edi B. Saǵyntaev aqpan aıynda QR Ulttyq ǵarysh agenttiginiń keńeıtilgen alqa májilisinde.