Úkimet basshysy ákimdikterge kóterme-taratý ortalyǵyn salýǵa jer bólýdi tapsyrdy
«Kóterme-taratý ortalyqtary keshenin qurý jumysy jemis, kókónis óndirisin arttyrýdyń, onyń ishinde sýarmaly jerlerde ónim ósirý kólemin arttyrýdyń negizgi faktoryna aınalady. Azyq-túlik saqtaý jáne taratýdyń jańa tehnologııasy jasalady. Ulttyq taýar júıesin qurý jobasy 2022 jylǵa deıin úsh kezeńde iske asyrylady. 24-ten asa kóterme-taratý ortalyǵy salynady. Bul shamamen 4,8 mln tonna agroónimdi saqtaýǵa, óńdeý men taratýǵa múmkindik beredi. Bıyldyń ózinde Pavlodar, Almaty jáne Túrkistan oblystarynda, sondaı-aq qosymsha Jambyl oblysyn kóremiz – birneshe kóterme-taratý ortalyǵy iske qosylady», - dedi Asqar Mamın Úkimet otyrysynda.
Úkimet basshysy sonymen qatar jasalyp jatqan ınfraqurylym jınalǵan jemis, kókónis ónimderiniń 100 paıyz saqtalýyna qamtamasyz etýge jáne shyǵyndy azaıtýǵa múmkindik beretinin jetkizdi.
«Nátıjesinde aýyl sharýashylyǵy taýaryn óndirýshilerdi óz óndirisin ulǵaıtýǵa yntalandyrady. Ónimniń saqtalýyn qamtamasyz etedi. Sondaı-aq, barlyq óńirde kóterme-taratý ortalyǵy jelisiniń bolýy – maýsymaralyq kezeńde azyq-túlik tapshylyǵy máselesin de sheshedi. Naryqta ónim jetkilikti bolsa onyń baǵasy óspeıdi. Besinshiden kóterme-taratý ortalyqtaryn iske qosqanda birinshi kezeńniń ózinde baǵa belgileýdiń ashyqtyǵy jáne tıimdi saýda mehanızmderiniń arqasynda biz agrarlyq ónim baǵasy 25 paıyzǵa deıin tómendeıtininin boljap otyrmyz», - dedi ol.
Asqar Mamın bul rette jumysqa tsıfrlyq tehnologııalardy engizýdiń mańyzdylyǵyn da erekshe atap ótti.
«Sondyqtan naqty mynadaı tapsyrma beremin: birinshiden ákimdikter kóterme-taratý ortalyqtaryna jer ýchaskelerin berip, olarǵa qajetti ınfraqurylymdy jetkizýdi tapsyramyn. Sondaı-aq keńeıtý jáne jańa óndiristerdi qurýǵa jeke sektordy tartý múmkindigin qarastyrý qajet. Saýda jáne ıntegratsııa mınıstrligi ákimdiktermen birlesip, kóterme-taratý ortalyqtarynyń birinshi kezeńin iske qosýdy qamtamasyz etsin. Úshinshiden Saýda jáne ıntegratsııa mınıstrligi men Aýyl sharýashylyǵy mınıstrligi ákimdiktermen birlesip, aýyl sharýashylyǵy taýaryn óndirýshilermen ónimdi kóterme-saýda ortalyqtaryna jetkizý máselesin pysyqtasyn», - dedi Asqar Mamın.
Eske sala ketsek buǵan deıin Saýda jáne ıntegratsııa mınıstri Baqyt Sultanov bıyl Almaty, Pavlodar jáne Túrkistan oblystarynda aýyl sharýashylyǵy taýarlaryn saqtaýǵa arnalǵan 5 kóterme-taratý ortalyǵyn salý kózdelip otyrǵanyn málim etken edi.
