Úkimet basshysy ákimderge: Monopolısterdiń jeteginde kettińizder
Úkimettiń búgingi otyrysynda kelesi jyldan bastap barlyq kommýnaldyq tarıfterdi tómendetý máselesi qaraldy. QR Ulttyq ekonomıka mınıstri Tımýr Súleımenovtiń aıtýynsha, qazirdiń ózinde birqatar oblystarda tarıfter tómendep otyr. Al kelesi jyldan bastap barlyq aımaqtarda kommýnaldyq qyzmetter arzandaıdy. Alaıda Atyraý men Qyzylorda oblystarynda gazdyń baǵasy tómendemeıdi. Sebebi Atyraýda gazdyń tarıfteri onsyz da tómen, al Qyzylordada barlyq ınvestıtsııalyq baǵdarlamalar oryndaldy. Sol sebepti tarıfterdi tómendetýge rezerv joq. Alaıda Úkimet basshysy Baqytjan Saǵyntaev ondaı ýájben kelispedi. "Sizder ol jaqta onsyz da tarıf tómen deısizder. Másele onda emes. Memleket basshysy naqty tapsyrma berdi. Endi, xalyq osy tapsyrmanyń oryndalǵanyn kútpeı me? PIK tarıfteri bar, basqa da kommýnaldyq qyzmetter bar. Ákimdikter naqty sheshim shyǵarmasa, Prezıdenttiń tapsyrmasyn oryndamady deýge bolady. Buny qalaı túsinýge bolady? Bir sózben aıtqanda monopolısterdiń jeteginde kettińizder", - dedi B. Saǵyntaev.
Úkimet basshysy jyldyń aıaǵyna deıin tıisti sheshimderdi shyǵarýdy tapsyrdy. Al ákimder atqarylǵan jumystar boıynsha esep beretin bolady. "29 jeltoqsanda Úkimettiń taǵy bir otyrysyn ótkizemiz. Sol otyrysta búgin kórsetilgen tablıtsalarda kimde sheshim joq, sol ákimder baıandama jasasyn", - dep atap kórsetti B.Saǵyntaev.
Aıta keteıik, jaqynda QR Ulttyq ekonomıka mınıstrligi kommýnaldyq tarıfterdiń tómendeýine qatysty naqty esepti jarııalady. Osy oraıda vıtse-mınıstr S.Jumanǵarın eki bólmeli páter úshin kommýnaldyq tarıfterdiń qalaısha ózgeretinin mysalmen kórsetti. Budan bólek, mınıstrlik eki oblysta gazdyń arzandamaýyna qatysty túsinikteme berdi.
