Úkimet basshysy Agroónerkásiptik keshendi damytýdyń 2013-2020 jyldarǵy salalyq baǵdarlamasynyń jobasyn talqylaýǵa arnalǵan keńes ótkizdi

Bul týraly Úkimet basshysynyń resmı saıtynda habarlandy.

Memleket basshysynyń tapsyrmasyna sáıkes ázirlengen bul Baǵdarlama agroónerkásiptik keshen sýbektileriniń básekege qabilettigin arttyrýǵa jáne olardy ári qaraı damytýǵa jaǵdaı jasaýǵa baǵyttalǵan. Baǵdarlama agroqurylym basshylarynyń, depýtattyq korpýstyń, salalyq jáne bıznes-qaýymdastar men sarapshylardyń talqysyna salyndy.

Baǵdarlama tórt baǵytta, atap aıtqanda, qarjylyq ońaltý, AÓK sýbektileri úshin taýarlardyń, jumystar men qyzmetterdiń qoljetimdiligin arttyrý, AÓK sýbektilerin qamtamasyz etýdiń memlekettik júıelerin damytý jáne AÓK-di memlekettik retteý júıesiniń tıimdiligin arttyrý baǵyttarynda iske asyrylady.

Baǵdarlama aıasynda memleketke nesıe júgin jeńildetýge múmkindik beretin jáne aýyl sharýashylyǵy taýarlaryn óndirýshilerdiń bankrot bolýyna jol bermeıtin tetikter ázirlenip otyr. Atap aıtqanda, qarjylyq ońaltý tetigi olardyń bereshekterin óteý úshin aýyl sharýashylyǵy taýarlaryn óndirýshilerdi qarjylandyrý arqyly júrgiziletin bolady.

Baǵdarlama aıasynda sondaı-aq, AÓK sýbektilerin qoldaýdyń ınvestıtsııalyq sýbsıdııalaý, qamsyzdandyrý jáne AÓK sýbektileriniń qarjy ınstıtýttarynyń aldyndaǵy zaımdaryn kepildendirý, ekinshi deńgeıli bankterdi qarjylandyrý sııaqty joldary qarastyrylýda. Baǵdarlama aıasynda sonymen birge, egin sharýashylyǵy, mal sharýashylyǵy ónimderin óndiretin  jáne aýyl sharýashylyǵy ónimderin óńdeıtin  óndirister de sýbsıdııalanady.

Keńes barysynda Baǵdarlamanyń negizgi baǵyttary egjeı-tegjeı talqylandy. Baǵdarlamany kelesi aıda Úkimet otyrysynda qabyldaý josparlanýda.

Búgingi talqylaýǵa Aýyl sharýashylyǵy mınıstri Asyljan Mamytbekov, Qarjy mınıstri Bolat Jámishev jáne basqa da ortalyq atqarýshy organdardyń basshylary qatysty.

Serik Ahmetov keńes qorytyndysy boıynsha ýákiletti organdarǵa birqatar tapsyrma berdi.