Úkimet basshysy Ádilet mınıstrligine Keden odaǵyna qatysty qujattardy ázirleý barysynda ulttyq múddeni jan-jaqty eskerýdi tapsyrdy

dep habarlaıdy QazAqparat.

Úkimet basshysynyń pikirinshe, bul asa kúrdeli mindet, sebebi atalmysh qujattardy daıyndaıtyn merzim asa qysqa, al qoıylyp otyrǵan mindettiń júgi aýyr. «Alaıda bul kelisimder ratıfıkatsııalanǵannan keıin ulttyq zańnamadan joǵary turatyn bolady. Sondyqtan da bizdiń ulttyq múddelerimizdi qorǵaı alý úshin bul tusta eshqandaı da qatelikterge jol berýge bolmaıdy», dedi K. Másimov.

Úkimet basshysy osy oraıda mınıstr Rashıd Túsipbekovke Keden odaǵynyń jáne Birtutas ekonomıkalyq keńistiktiń qujattarymen jumys isteıtin turaqty jumys tobyn aıqyndaýdy tapsyrdy. «Buǵan deıin bizde yqpaldastyq birlestikter kóbinese usynystyq sıpatta boldy: kezdesip, kelissózder júrgizip, rezolıýtsııa qabyldaıtyn. Sodan keıin, saıyp kelgende, ony eshkim de oryndamaıtyn», dedi Úkimet basshysy.

Onyń aıtýynsha, Keden odaǵy múldem basqa qurylym. Ol kóptegen ózara is qarym-qatynastardy túbegeıli ózgertedi. Máselen, Qazaqstannyń da, Belarýstyń da, Reseıdiń de Úkimeti kedendik baj salyqtaryn óz betterinshe bekite almaıdy. Endi bul másele Keden odaǵynyń quzyrynda.

Úkimet basshysynyń paıymdaýynsha, Birtutas ekonomıkalyq keńistik qurylǵasyn kóptegen fýnktsııalar túbegeıli ózgeretin bolady. «Osynyń barlyǵy Qazaqstannyń óz óndirisin, óz ındýstrııasyn damytyp, taýarlaryn 170 mln. adamdyq naryqqa sata alýy úshin jasalyp otyr. Maqsat - óz ónimderimizdi jaqyn naryqtarǵa eshqandaı kedergisiz satý. Bul óte mańyzdy másele. Ony quqyqtyq turǵydan qamtamasyz etý asa mańyzdy», dedi ol.