Úkimet basshysy 400 mektep salý boıynsha tıisti usynystar engizýdi tapsyrdy
ASTANA. 29 qańtar. QazAqparat /Arman Asqarov/ - Búgin Úkimet otyrysynda Premer-Mınıstr Kárim Másimov QR Bilim jáne ǵylym mınıstrligine elimizde 400 mektep salý boıynsha tıisti usynystar engizýdi tapsyrdy.
«Elimizdegi bilim berý oshaqtarynyń apattyq jaǵdaıy, mekteptegi oqýshylar oryndarynyń jetispeýshiligi men halyqtyń demografııalyq ósýin eskere otyryp, QR Bilim jáne ǵylym mınıstrligi oblys basshylary, Astana jáne Almaty qalalarynyń ákimderimen birlesip aımaqtarda respýblıkalyq bıýdjet esebinen 200 mektep jáne jergilikti bıýdjetterdiń qarjysyna 200 mektep salý qajettigin zerttep shyǵýy tıis. Atalǵan bilim berý oshaqtarynyń 2015 jylǵa eseptelgen qurylys kestesi boıynsha tıisti usynystardy bir aıdyń kóleminde Úkimettiń qaraýyna engizýdi tapsyramyn», - dep atap kórsetti K.Másimov.
