Úkimet basshysy 1 qazanǵa deıin jylý elektr ortalyqtaryn otyn qorymen qamtamasyz etýdi tapsyrdy

NUR-SULTAN. QazAqparat – Búgin Úkimet otyrysynda jylý berý maýsymyna daıyndyq máselesin talqylaý kezinde Premer-Mınıstr Álıhan Smaıylov óńir ákimdikterine tapsyrmalar berdi, dep habarlaıdy QazAqparat tilshisi.

«Barlyq jóndeý jumystaryn belgilengen merzimde aıaqtaý qajet. Energetıkalyq kásiporyndarmen birlesip, qysqa merzimde jylytý maýsymyna daıarlyq pasporttaryn alýdy qamtamasyz etińizder», - dedi Á. Smaıylov.

Úkimet basshysy 1 qazanǵa deıin barlyq jylý elektr ortalyqtary men derbes jylý berý kózderin normatıvtik deńgeıde otyn qorymen qamtamasyz etýdi tapsyrdy. Otyn tapshylyǵyna jol bermeý úshin kómir jetkizýshilermen belsendi baılanys jasap, turaqty monıtorıng júrgizip otyrý qajet.

«Kásiporyndardyń gaz ben kómir úshin, al tutynýshylardyń kommýnaldyq qyzmetter úshin debıtorlyq bereshekterin óteý boıynsha jumysty kúsheıtý qajet. Jalpy, Energetıka jáne Indýstrııa mınıstrlikteri barlyq obektilerdiń jylytý maýsymyna daıyndyǵy boıynsha jumystyń aıaqtalýyn baqylaýdy jáne oǵan monıtorıng júrgizýdi qamtamasyz etsin. Bul másele Úkimettiń turaqty baqylaýynda bolady», - dedi Premer-Mınıstr.

Buǵan deıin habarlanǵandaı, Úkimet basshysy kómir baǵasynyń kúrt ósýine jol bermeý kerek ekenin tapsyrdy .