Úkimet Básekelestikti damytý máseleleri boıynsha zań jobasyn maquldady
«Adal báseke - elimizdiń jańa ekonomıkalyq baǵdarynyń negizgi bolatyn basty qaǵıdattardyń biri ekenin Memleket basshysy atap ótken. Sondyqtan básekelestiktiń uzaqmerzimdi jańa saıasatyn jasaýdyń mańyzy zor. Bul báseke men «jumsaq quqyq» quraldaryn keńinen qoldaný úshin neǵurlym jetildirilgen jaǵdaılar jasaýdy talap etedi, munyń ózi zańnamany buzý qaýpin tómendetedi. Prezıdent tapsyrmalaryn iske asyrý úshin básekelestikti damytý máseleleri boıynsha Zań jobasy ázirlendi, ol boıynsha 4 kodeks pen 6 zańǵa ózgerister men tolyqtyrýlar engiziledi», - dedi A. Mamın Úkimettiń búgingi otyrysynda.
Bul zań jobasynda básekelestikti damytýdyń bazalyq ekonomıka salalarynda, taýar naryqtarynyń, atap aıtqanda, baılanys, temirjol júk jáne jolaýshylar tasymaly, áýejaı qyzmetteri, agroónerkásip kesheni, kómir, farmatsevtıka, qurylys jáne taǵy da basqa naryqtarynyń jumys isteýinde básekeli ortany keńeıtýge baǵyttalǵan jańa tásilderi kózdeledi.
«Osyǵan baılanysty kelesi máselelerge nazar aýdarǵym keledi. Birinshi, básekelestikti damytý – bırjalyq saýda quraldaryn damytý jáne negizgi ınfraqurylymdyq qýattarǵa qol jetkizý sharttaryn keńeıtý arqyly júzege asyrylýǵa tıis. Naryq sýbektileriniń osy qýattarǵa qol jetkizýi qanshalyqty arzan, ári jeńil bolsa, sońǵy tutynýshy úshin baǵa da sonshalyqty tómen bolmaq. Osyǵan baılanysty Básekelestikti qorǵaý jáne damytý agenttigi bırja arqyly jumys istemeıtin sýbektilerdiń shekteýli resýrstaryna qol jetkizý sharttaryn ázirleý qajet», - dedi Premer-Mınıstr.
Ekinshiden, Úkimet basshysy qazirgi ýaqytta biryńǵaı operatorlar qurý jolymen naryq sýbektilerine aıryqsha quqyq bekitip berý praktıkasy qalyptasqanyn eske saldy.
«Bul básekeni shekteıdi. Memleket basshysynyń qandaı da bir aıryqsha quqyq berilgen kásipkerlik sýbektilerin qurýǵa moratorıı engizý jónindegi tapsyrmalaryn oryndaý sheńberinde agenttik ártúrli salalardaǵy memlekettik jáne jeke operatorlardyń qyzmetin retteý normalaryn qaıta qaraýy qajet. Úshinshi, usynylǵan Zań jobasy jańa tásilderdi iske asyrýdy qamtıdy jáne básekeniń damýyna kedergi keltiretin ákimshilik jáne ekonomıkalyq shekteýlerdi joıýǵa baǵyttalǵan. Zań jobasynda usynylatyn sharalardy iske asyrý taıaý perspektıvada memlekettiń el ekonomıkasyna qatysý úlesin 14% deıin azaıtýǵa múmkindik beredi. Sondyqtan usynylyp otyrǵan tásilderdi maquldap, osy zań jobasy úshin daýys berýdi suraımyn», - dedi Asqar Mamın.
Úkimet otyrysyna qatysyp otyrǵan barlyq 22 adam daýys berdi. Qalys qalǵandar joq.
«Sheshim qabyldandy. Básekelestikti qorǵaý jáne damytý agenttigi Zań jobasyn Parlamentte engizýdi qamtamsyz etsin. Baqylaý Álıhan Ashanulyna júkteledi», - dedi Premer-Mınıstr.
