Úkimet balyq sharýashylyǵyn damytýdyń 2030 jylǵa deıingi baǵdarlamasyn maquldady
«Іshki naryqty otandyq azyq-túlikpen tolyqtyrý – Úkimettiń basty mindetteriniń biri, sondaı-aq eldiń azyq-túlik qaýipsizdiginiń negizi. Osy turǵyda balyq sharýashylyǵy álemde, sondaı-aq Qazaqstanda da serpindi damyp kele jatqan perspektıvaly baǵyttardyń biri. Bul rette mamandardyń pikiri boıynsha elimizdiń balyq salasyn damytý boıynsha eleýli áleýeti bar ekenin atap ótkim keledi. Balyq sharýashylyǵy salasyn damytý úshin ońtaıly jaǵdaılar jasaýǵa, balyq ósirý sharýashylyǵy qurylysy kezinde shyǵyndardy qysqartýǵa, salany odan ári damytýǵa serpin beretin zańnamalyq túzetýler Parlamentte qaralýda», - dedi Asqar Mamın Úkimet otyrysynda.
Premer-mınıstrdiń aıtýynsha, baǵdarlama iske asyrylsa, bul aıtarlyqtaı ekonomıkalyq áser beredi.
«Máselen, balyq óniminiń eksporty qazir 30 tonna bolsa, 2030 jylǵa qaraı ol jylyna 136 tonnaǵa deıin ósedi degen boljam bar. Demek, óndiristi ulǵaıtý ımportty 45 tonnadan jylyna 25 tonnaǵa deıin azaıtýǵa múmkindik beredi. Balyqty ishki tutyný eki ese ulǵaıady. Budan basqa, balyq salasyn damytý 50 myńǵa deıin jumys ornyn qurýǵa múmkindik beredi. Jyl saıynǵy balyq ósirý kólemi 30 ese artyp, aǵymdaǵy jyldaǵy 9 myń tonnadan 2030 jyly 270 myń tonnaǵa deıin jetedi. Jalpy Ekologııa mınıstrliginiń usynystaryn qoldaımyz», - dedi ol.
Otyrysta Úkimet músheleri balyq sharýashylyǵy salasyn damytýdyń 2030 jylǵa deıingi baǵdarlamasynyń usynylǵan jobasyn maquldady.
«Ekologııa mınıstrligi múddeli memlekettik organdarmen jáne ákimdiktermen birlesip, baǵdarlamanyń is-sharalarynyń ýaqtyly iske asyrylýyn qamtamasyz etýi qajet jáne balyq sharýashylyǵy salasyn damytý boıynsha qoıylǵan kórsetkishterge qol jetkizilý kerek», - degen Asqar Mamın bul mindettiń oryndalýyn orynbasary Roman Sklıarǵa tapsyrdy.
