«Úkimet baǵany baqylaý tetigin zańmen qalaı bekitpek?» - respýblıkalyq basylymdarǵa sholý
ASTANA. Jeltoqsannyń 30-y. /QazAqparat/ - Qazaq aqparat agenttigi respýblıkalyq basylymdarda jeltoqsannyń 30-y, sársenbi kúni shyqqan ózekti materıaldarǵa sholýdy usynady.
Premer-Mınıstr Kárim Másimovtiń tóraǵalyǵymen ótken Úkimet otyrysynda «Jol kartasynyń» 2009 jylǵy oryndalý jaıy qaraldy. Tolyǵyraq «Egemen Qazaqstan» basylymynyń búgingi sanyndaǵy «Ótip bara jatqan jyldyń basty jetistikteri» degen taqyryptaǵy maqaladan oqı alasyzdar.
«Uly kósh bıyl da jalǵasady». Osy taqyryppen berilgen atalmysh basylymdaǵy kelesi maqala sheteldegi qandastarymyzdy kindik qany tamǵan jurtyna qaıtarý jalǵasyn tabatyndyǵyn jazypty. «Uly kósh áli jalǵasyp jatyr. Búgingi kúni tarıhı Otanyna mıllıonǵa jýyq qazaq oraldy»,- deıdi basylym.
"Juldyz" jýrnalynyń qarashańyraǵynda qyzmet atqarǵan shırek ǵasyrǵa jýyq ýaqyt belesinde ádebıetti tóńirektegen jazýshy-oqýshysy bar, talaı adam kóz aldymyzdan ótken eken. Aǵyn sýdaı syrǵyp óte shyqqan eles sııaqty, kóbiniń tańerteń kórseń, túske jetpeı túsin umytasyń. Bir kórgennen jarq etip júrek túbi, kóńil tórinde bederlenip bekip qalatyny neken-saıaq. Sol azdyń biri hám biregeıi mańǵaz basyp Mańǵystaýda júrgen marqasqa aǵam - Bektur Tóleýǵalıev desem, ústeme qosyp ásirelep aıtqanym bola qoımas». Osylaı oı órbitken «Egemen Qazaqstan» gazetindegi «Qazynaly júrek» taqyrybymen berilgen maqala kórnekti qalamger Bektur Tóleýǵalıev týraly jazypty.
***
«Bıylǵy jyldyń 27 qarashasynda Mınskide ótken EýrAzEQ memleketaralyq keńesiniń otyrysynda Belarýs, Qazaqstan Respýblıkasy jáne Reseı Fedratsııasynyń prezıdentteri 2010 jyldyń 1 shildesine qaraı Kedendik odaqtyń birtutas kedendik aımaǵyn qurý jáne Kedendik odaqtyń 2010 jyldyń 1 qańtarynan bastap óz jumysyn bastaıtyny týraly sheshim qabyldady», - dep jazǵan «Aıqyn» basylymynyń búgingi sanyndaǵy EýrAzEQ- nyń Bas hatshysy Taıyr Mansurovtyń kólemdi maqalasy «Eýrazııalyq ıdeıa bolmys aqıqatyna aınaldy» degen taqyryppen berilgen.
Keshe Úkimet qabyrǵasynda ótken selektorlyq májiliste Premer-Mınıstr Kárim Másimov Qazaqstanda janarmaı baǵasyna memlekettik baqylaý mehanızimi zańmen bekitiletinin habarlady. «Úkimet baǵany baqylaý tetigin zańmen qalaı bekitpek?» Anyq-qanyǵyn osy maqaladan oqyńyzdar.
Sondaı-aq «Aıqyn» gazetiniń «Rýhanııat» aıdarynda jaryq kórgen «Kúıdiń kemel sardary» atty maqala Qazaqstannyń eńbek sińirgen qaıratkeri, kúıshi, tolǵaýshy Shámil Ábiltaıdyń ónerine toqtalypty. «Búginde ónerde ǵana emes, ómirde de jasandylyq, jyltyraqtyq, dańǵazalyq beleń alyp turǵany barshaǵa málim. Sol jasandylyq, jyltyrlyqtan ada, shynaıy, tabıǵı qalpyn buzbaǵan jandardyń biri - biz aıtyp otyrǵan Shámil Ábiltaı. Ómirde de, ónerde de»,- deıdi basylym.
***
«...Kósilip sóılep tur. Úlken zal toly halyq túgeldeı uıyp tyńdaýda. Shybynnyń ushqan yzyńy estilerdeı. Qıynnan qıysqan logıka, kesteli sóz, kelisti daýys máneri, bulaqtaı syldyraǵan móldir oı ár qulaqtyń quryshyn qandyrǵandaı. Júrekten quıylǵan qońyr ún sana tórinde kúmbirleıdi. Ol qııaldy birde bıik qııalǵa alyp ushady, birde sulý álemge engizedi, tereń sezim qushaǵyna bóleıdi. ár adam demin ishinen alyp, shalqar shabyt tutqynyna túsken. Bir saǵat boıyna tylsym tirshilik qupııasynan syr taratqandaı. Telegeı-teńiz sheshendik qudireti bul». Osylaı tolǵaǵan «Altyn orda» aptalyǵynyń osy jolǵy sanyndaǵy «Adamzattyń Ábishi» taqyrybymen berilgen maqala Ábish Kekilbaıulynyń ómir joldaryna arnalǵan.
Osydan bir aıdan buryn Kenesary han atyndaǵy qor qurylǵan bolatyn. Qordy qurýshy - saıasatker Ýálıhan Qaısarov. «Kenesary qory ne úshin quryldy?» Osy saýalǵa jaýap izdegińiz kelse, «Altyn orda» aptalyǵyndaǵy Ýálıhan Ábishulymen bolǵan suhbatqa nazar aýdaryńyz.
Sondaı-aq osy basylymda Saǵat Arynulynyń áıgili Sáken Seıfýllın týraly jazǵan «Sálem de Kókshetaýdyń bıigine...» atty essesiniń jalǵasy jarııalanǵan.
