Úkimet azamattardyń qaza bolýy men jaraqat alýyn azaıtý jónindegi is-sharalar josparyn bekitti

Tótenshe jaǵdaılar mınıstrligi baspasóz qyzmetiniń aǵa ınjeneri Lıýbov Shaposhnıkovanyń aıtýynsha, atalǵan is-sharalar jospary 21 tarmaqtan turady. Negizinen olar kóp páterli turǵyn úılerdiń órtke qarsy jaǵdaıyn tekserý, oqý oryndarynda órtke qarsy is-sharalar keshenin, onyń ishinde órttiń aldyn alýǵa baǵyttalǵan ınteraktıvti sabaqtar, vıktorınalar, konkýrstar, rolıkter men beınefılmder kórsetý, áleýmettik nysandardyń órt qaýipsizdigine baılanysty jaǵdaıyn talapqa saı etý baǵytynda qajetti sharalardy qoldaný bolyp tabylady.

«Jalpy alǵanda órtke qarsy qyzmet ókilderi, jergilikti atqarýshy organdar jáne páter ıeleri kooperatıvimen birlesip, jyl saıyn jylytý maýsymy aldynda órtterdiń aldyn alý úshin turǵyn úı sektorynyń aýlalary men páterlerin aralaıdy. Osy baǵytta aı saıyn shamamen 200 jınalys ótedi»,-dedi L.Shaposhnıkova.