Úkimet áıelderge arnalǵan jańa jumys oryndaryn ashýǵa kiristi - QR Premer-Mınıstri
ASTANA. 5 mamyr. QazAqparat - Áıelderdiń áleýmettik qorǵalýy turǵysynda biz jaýapkershilikti sezinip otyrmyz.
Bul týraly búgin «Habar» telearnasyndaǵy «Jeti kún» baǵdarlamasyna bergen suhbatynda Úkimet basshysy Serik Ahmetov málim etti.
«Jalpy osy zeınet jasyn birizdendirýde, ıaǵnı erler men áıelderdiń jasyn teńestirýde álemdik tájirıbede bul másele qalaı rettelgen. Sosyn áıelderdiń áleýmettik qorǵalýy osy reforma negizinde iske asa ma?» -dep qoıǵan tilshi saýalyna S. Ahmetov: «Bul - úlken jumys. Biz Úkimette jan-jaqty qarap, zerdelep otyrmyz. Bundaı másele bizdiń elde ǵana týyndap otyrǵan joq. Bul - álemdik qubylys. Ony barshamyz bilemiz. Sondyqtan álemdik tájirıbe týraly aıtsaq, kóptegen elder zeınetaqy jasyn ulǵaıtýda. Árıne, biz jaýapkershilikti sezinip otyrmyz. Bul turǵyda áıelderge arnalǵan jańa jumys oryndaryn ashýdy, olardy barynsha jumyspen qamtýdy qolǵa alýdamyz. Osy maqsatta 2020 jylǵa deıin 500 myńnan astam jańa jumys ornyn ashý josparlanýda»,-dep jaýap qaıtardy.
S.Ahmetov Úkimettiń birinshiden, bala kútimine baılanysty demalysta otyrǵan, ekinshiden, ózin-ózi jumyspen qamtyǵan, úshinshiden, jumyssyz júrgen áıelder úshin arnaıy is-sharalar josparyn ázirlegenin jetkizdi.
«Zeınet jasyn kótergen mundaı tájirıbe basqa elderde de bar. Sondyqtan Úkimette zeınetkerlikke jaqyndaǵan adamdardy áleýmettik jaǵynan qosymsha qorǵaý úshin «50+» bastamasyn, ıaǵnı 50 jastan asqandardy jumyspen qamtý josparyn qabyldadyq»,-dep túıdi S. Ahmetov.
