Úkimet aýyldyń ahýalyn arttyrýǵa baǵyttalǵan Elbasy tapsyrmasyn oryndaýǵa asyǵar emes - R. Halmuradov

ASTANA. 6 qarasha. QazAqparat - Aýyldyń ahýalyn arttyrýǵa baǵyttalǵan Elbasy tapsyrmasyn Úkimet oryndaýǵa asyǵar emes. Búgin Parlament Májilisiniń jalpy otyrysynda depýtat Rozaqul Halmuradov osylaı málim etti. Eske sala keteıik, jalpy otyrysta «QR keıbir zańnamalyq aktilerine agroónerkásip keshen máseleleri boıynsha ózgerister men tolyqtyrýlar engizý týraly» zań jobasyn talqylanǵan bolatyn.

«Osydan bir aıǵa jýyq buryn Aqordada ótken Úkimettiń keńeıtilgen otyrysynda Elbasy N. Nazarbaev ekonomıkanyń barlyq salalaryn, onyń ishinde aýyl sharýashylyǵy mınıstrligin de qatań synǵa alǵan bolatyn. Budan keıin tórtinshi qarashada Prezıdent Ákimshiliginiń Basshysy jáne onyń orynbasarlarymen ótkizgen jıynda Elbasy óziniń Úkimetke bergen tapsyrmasynan esh nátıje shyqpaǵanyn aıtyp ótti. Al biz talqylap jatqan zań jobasynda agroónerkásiptik keshendi jáne aýyldyq aýmaqtardy memlekettik retteý týraly zańyna ózgeris engizý arqyly damytý kózdeledi», deı kele depýtat búgingi kúni aýyldyq eldi mekenderdiń ahýaly nasharlap baratyndyǵyn alǵa tartty. «Búgingi zań jobasymen aýyl jastaryn, aýyl sharýashylyǵynyń mamandaryn elge qaıtarý úshin bıýdjetten qarjy bólýdi qarastyramyz. Sebebi aýylda jastar úshin qajetti ınfraqurylym joq. Basty sebep sodan. Qala men aýylǵa teń jaǵdaı jasalsa jastar aýyldan qashpas edi», - deıdi R. Halmuradov. «Aýyl sharýashylyǵy mınıstri retinde emes, Úkimet múshesi retinde sizge suraq qoıǵym keledi: Prezıdenttiń aýyldyq ınfraqurylymdy damytýǵa qatysty tapsyrmasyn Úkimet qashan jáne qalaı atqarmaq?», - dedi ol. Óz kezeginde mınıstr Asyljan Mamytbekov depýtattyń ustanymymen tolyq kelisetinin aıtyp, aýyl sharýashylyǵy men aýyldyq aýmaqty damytý tek agrobıznespen ǵana shektelmeıtinin jetkizdi. «Úkimet aýylǵa jas mamandardy aparý úshin jan-jaqty jumys jasalatyn bolady. Bul úshin «Agrobıznes-2020» baǵdarlasymen ushtasatyn sharalar qabyldaý baǵytynda jumystar atqarylyp jatyr. Keshe ǵana osyǵan qatysty jınalys ótti. Barlyq suraqtar qaıta qaralyp, qaı baǵdarlamaǵa qandaı ózgerister engizý kerektigi saralandy», - dedi mınıstr A. Mamytbekov.