Úkimet aýyl sharýashylyǵyna arnalǵan jańa baǵdarlamany maquldady
«Jaqynda «Agrobıznes - 2020» baǵdarlamasyna ózgeris engizilip, 2013-2017 jyldarǵa deıin qysqartyldy. Sonyń ornyna mınıstrlik jańa memlekettik baǵdarlamany ázirledi. Atalǵan baǵdarlama keıingi 2017-2021 jyldardy qamtıdy. Búgin Úkimet saǵatynda ol baǵdarlama tanystyrylyp qabyldandy», - deıdi E.Axmetov.
Mınıstrliktiń baspasóz qyzmetiniń xabarlaýynsha, búgin Úkimet jańa baǵdarlama boıynsha arnaıy qaýlyny qabyldap, ary qaraı Prezıdent Ákimshiligine jiberdi.
Jalpy, jańa baǵdarlama aıasynda aýyl sharýashylyǵy ónimderin shyǵarý kólemi 1,3 esege artyp, tabystyń mólsheri 3,3 trln-nan. 4,3 trln. Teńgege deıin artady degen boljam bar. Agroónerkásip salasyndaǵy ónim óndirýshilerdi memlekettik qoldaý deńgeıi 7 esege ulǵaıady. Negizgi maqsat - otandyq ónimderdi barynsha kóbeıtip, ishki naryqty toltyrý. Osy oraıda otandyq kásiporyndardyń ónim óńdeý kórsetkishin barynsha arttyrý josparlanǵan. Ol úshin jergilikti jerde kooperatıvter kóptep qurylady.
Aıta keteıik, qarashanyń 29-y kúni ótken Úkimet otyrysynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov 2017-2021 jyldarǵa arnalǵan Agroónerkásip keshenin damytý baǵdarlamasyn tanystyrǵan bolatyn.
Baǵdarlama aıasynda astyq alqaptarynyń kólemin 2,3 mln. gektarǵa azaıtý josparlanǵan. Osynyń nátıjesinde jyl saıyn 3 mln. tonnaǵa az bıdaı jınalatyn bolady. Sebebi búginde elimizde 2,9 mln. tonna bıdaı artylyp qalyp otyrady. Endi, sonyń ornyna maıly daqyldardy kóptep ósirý kózdelip otyr. Óıtkeni osy sanattaǵy ónimderdiń tapshylyǵy bar. Máselen, arpa (1,2 mln. tonna), qant qyzylshasy (1 mln. tonnaǵa jýyq), júgeri jáne taǵy basqa dándi-daqyldarǵa suranys joǵary bolyp tur. Sonyń barlyǵy syrttan jetkiziledi. Al jańa baǵdarlama aıasynda atalǵan ónimderdi ózimizde óndirip, ishki naryqty barynsha toltyrý josparlanǵan. Budan bólek, et pen sút óndirisin damytý jumysyna basa nazar aýdarylady. Ol úshin aýyldy jerlerde kooperatıvterdi kóptep ashý josparlanǵan.
«Búgingi tańda aýyl sharýashylyǵy ónimderiniń 70-90 paıyzy qosalqy sharýashylyqtarda óndiriledi. Al ol ónimniń bári zaýyttarǵa jetkizilmeıdi. Sonyń saldarynan qaıta óńdeý kórsetkishi 30 paıyzdan aspaı otyr. Máselen, qazir elimizde 400-den astam qaıta óńdeıtin kásiporyn bar. Olardyń barlyǵy tek 20-60 paıyzǵa ǵana jumys istep tur. Sondyqtan jańa baǵdarlama aıasynda qaıta óńdeýdi ulǵaıtyp, ishki naryqty daıyn ónimdermen barynsha toltyrý josparlanyp otyr. Ol úshin respýblıka boıynsha 1200 kooperatıv qurylady. Olar qaıta óńdeýge qajetti ónimdi daıarlaıdy. Bizdiń esebimizge sáıkes, osy sharalardyń arqasynda aýyl xalqy óz ónimderin satyp, shamamen 300 mlrd. teńge kóleminde tabys taba alady», - deıdi Myrzaxmetov.
Onyń aıtýynsha, jańa baǵdarlama aıasynda memleket mal sharýashylyǵy salasynyń tıimdiligin 40 paıyzǵa, al ósimdik sharýashylyǵyn 30 paıyzǵa deıin arttyrmaqshy. Mınıstrler kabıneti jańa baǵdarlamanyń engizilýin qoldady. Alaıda resmı túrde maquldaǵan jón. Premer-Mınıstr B.Saǵyntaev atalǵan qujatty tolyǵymen pysyqtap, jeltoqsan aıynda maquldaýdy uıǵardy. «Jańa jyldan bastap biz jańa baǵdarlama boıynsha jumys isteýimiz kerek»,- dedi ol.