Úkimet Astana aýdandarynyń shekarasyn ózgertý týraly qaýlynyń jobasyn tanystyrdy
ASTANA. QazAqparat - 17 aqpan kúni «Vechernıaıa Astana» gazetinde «Qazaqstan Respýblıkasynyń astanasy - Astana qalasynyń aýdandarynyń shekaralaryn belgileý týraly» Qazaqstan Respýblıkasynyń Úkimeti qaýlysynyń jobasy jarııalandy, dep habarlaıdy Elorda Info.
Qaýly jobasynda Qazaqstan Respýblıkasynyń 2007 jylǵy 21 shildedegi «Qazaqstan Respýblıkasy astanasynyń mártebesi týraly» Zańynyń 5-babyna sáıkes, Qazaqstan Respýblıkasy Prezıdentiniń 2017 jylǵy 6 aqpandaǵy «Astana qalasynyń shekarasyn ózgertý týraly» №418 Jarlyǵyna negizdelip, Astana qalasy aýdandarynyń shekaralarynyń sıpattamasy jáne shemalyq kartasy boıynsha, Astana qalasy aýdandarynyń shekaralary belgilendi.
Aýdandar shekaralarynyń sıpattamasy:
Jobaǵa sáıkes, «Almaty» aýdanynyń soltústik shekarasy Aqbulaq ózeninen; odan ary 101 kóshesinen (jobalyq ataý), odan ary A. Pýshkın kóshesiniń shyǵysyndaǵy kósheden (A-344), odan ary Aqbulaq ózeninen; shyǵys jaǵy Astana qalasynyń qazirgi shekarasynyń boıymen; ońtústik shekarasy Esil ózeninen; batys shekarasy Esil ózeninen, odan ary Aqbulaq ózeni boıymen ótedi.
Saryarqa aýdanynyń soltústik shekarasy temirjol; shyǵys shekarasy Bógenbaı batyr dańǵyly, odan ary Respýblıka dańǵylymen; ońtústik shekarasy Esil ózeni, batys shekarasy Astananyń qazirgi shekarasymen shektesedi.
Esil aýdanynyń soltústik shekarasy Esil ózeni boıymen; ońtústik-shyǵys, ońtústik jáne ońtústik-batys shekaralary elordanyń qazirgi shekarasymen ótedi. Aýdanǵa 7300 gektar Maıbalyq kóli men Ulttyq panteon kiredi (959 ga).
Jańadan qurylyp jatqan ákimshilik aýdannyń soltústik shekarasy Astananyń qazirgi shekarasymen; shyǵys shekarasy Aqbulaq ózeninen, odan ary 101 kóshesimen (jobadaǵy ataý); odan ary A. Pýshkın kóshesiniń shyǵysyndaǵy kósheden (A-344), odan ary Aqbulaq ózeninen; ońtústik shekarasy Esil ózeninen, odan ary Respýblıka dańǵylynan; odan ary temirjolǵa deıin Bógenbaı batyr dańǵylynan, keıin temirjoldyń boıymen Astananyń qazirgi shekarasynan; batys shekarasy Astananyń qazirgi shekarasynan ótedi. Aýdanǵa qalalyq mola (460 ga) kiredi.
Budan tys, «Astana aqshamy» gazetinde Astana qalasy máslıhatynyń 2008 jylǵy 18 tamyzdaǵy № 134/21-IV birlesken sheshimin jáne Astana qalasy ákimdiginiń 2008 jylǵy 22 tamyzdaǵy «Astana qalasyndaǵy aýdandardyń shekaralary týraly» № 66 qaýlysyn kúshin joıdy dep taný týraly Astana qalasy máslıhatynyń birlesken sheshiminiń jáne Astana qalasy ákimdigi qaýlysynyń jobalary da jarııalandy.
Eske sala keteıik, buǵan deıin Astana máslıhatynyń depýtattary Astananyń jańa aýdanyn Baıqońyr dep ataýǵa qoldaý bildirgen bolatyn. Biraq bul máselede áli naqty sheshim qabyldanǵan joq.
