Úkimet Ashyq jobasy kóshbasshylaryna jeńildikter bermek

NUR-SULTAN. QazAqparat – QR Densaýlyq saqtaý mınıstri Alekseı Tsoı Ashyq jobasy kóshbasshylaryna birqatar jeńildik beriletindigin aıtty, dep habarlaıdy QazAqparat tilshisi.

«Jobany engizýdiń oń áserin eskere otyryp, «Atameken» UKP-men birge joba kóshbasshylaryn yntalandyrý krıterııi ázirlendi. Atap aıtqanda, joba kóshbasshylary qyzmet túrine baılanysty 2 aptanyń ishinde nysandaǵy tirkeý sany boıynsha anyqtalady», - dedi mınıstr búgin Úkimet otyrysynda.

Onyń atap ótýinshe, bul ádis elordanyń jáne respýblıkalyq mańyzy bar qalalardyń erekshelikterin eskeretin bolady.

«Ashyq jobasynyń kóshbasshysy mártebesin alǵan qatysýshylar jumys ýaqyty men sharttary boıynsha qosymsha jeńildikter alady. Sonymen qatar Ashyq jobasyna týrıstik sala nysandaryn, bilim ortalyqtaryn, balalardy saýyqtyrý uıymdaryn qosý máselesi pysyqtalyp jatyr», - dedi ol.