Úkimet AÓK-di saýyqtyrýǵa 500 mlrd. teńge bóledi

ASTANA. QazAqparat - Daǵdarysqa qarsy is-sharalar aıasynda Qazaqstannyń agrarlyq-ónerkásiptik keshenin (AÓK) saýyqtyrýǵa 500 mlrd. teńge bólinedi.

Bul týraly OKQ brıfınginde QR Parlamenti Májilisiniń depýtaty Raýan Shaekın aıtty.

«Memleket basshysy daǵdarysqa qarsy sharalar aıasynda agrarlyq sektordy saýyqtyrýǵa qatysty tapsyrmalar berdi. Atalǵan baǵdarlama aıasynda 292 nysan jalpy somasy 313 mlrd. teńgege qarjylaı saýyqtyrý sharalarymen qamtyldy. QR Prezıdenti bul qarajatty 500 mlrd. teńgege deıin ulǵaıtýǵa tapsyrma bergen bolatyn. Bıýdjetke engizilgen túzetýlerge keshe ǵana qol qoıylysymen, «Bank RBK» AQ qarajat málimetterin bekitti. Endi AÓK nysandaryn qarjylaı saýyqtyrýmen aınalysatyn komıssııa óz jumysyn odan ári jalǵastyra beredi», - dep atap ótti R.Shaekın.

Onyń aıtýynsha, elimizde qarjylaı saýyqtyrýǵa zárý 292 aýyl sharýashylyq nysany bar.

«Olar kezinde EDB-terden 16-18 paıyzdyq kórsetkishpen nesıeler alyp, naryqtaǵy básekelestikke shydamaı, qaryzǵa batyp qalǵan nysandar. Qarjylaı saýyqtyrý degenimiz, memleket bólgen qarajat osy qaryzdardyń EDB men basqa da qarjylyq uıymdarǵa tólenetin paıyzdarynyń jartysyn jabýǵa jumsalady. Memleket shyǵyndardyń bir bóligin óz moınyna alady jáne atalǵan nesıeni jabý ýaqyty 9 jylǵa uzartylady», - dep túsindirdi depýtat.