Úkimet álipbıdi latyn grafıkasyna kóshirý boıynsha 4 jumys tobyn qurdy

ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaevtyń tóraǵalyǵymen qazaq tili álipbıin latyn grafıkasyna kóshirý jónindegi Ulttyq komıssııanyń birinshi otyrysy ótti, dep habarlaıdy QazAqparat primeminister.kz -ge silteme jasap.

Ulttyq komıssııa Úkimettiń janyndaǵy konsýltatıvtik-keńesshi organ bolyp tabylady, onyń negizgi maqsaty - qazaq álipbıin latyn grafıkasyna kóshirý boıynsha usynystar ázirlep bekitý, jumys barysyn úılestirý jáne onyń sapaly oryndalýyna baqylaý jasaý.

Baqytjan Saǵyntaevtyń tóraǵalyǵymen komıssııa quramyna tóraǵanyń orynbasary - QR Premer-Mınıstriniń orynbasary E. Dosaev, sonymen qatar QR Prezıdenti Ákimshiliginiń, «Nur Otan» partııasynyń, QR Parlamentiniń, joǵarǵy oqý oryndarynyń, buqaralyq aqparat quraldarynyń, qoǵamdyq uıymdardyń, belgili ǵalymdar men qoǵam qaıratkerleri tartyldy. Komıssııanyń jumys organy Mádenıet jáne sport mınıstrligi.

«Latyn álipbıine kóshý - elimiz úshin aıryqsha máni bar tarıhı oqıǵa. Elbasy aıtqandaı, halqymyz san myń jyldyq tarıhynda eshqandaı syrtqy yqpalsyz, óz erkimen, jalpyhalyqtyq talqylaýmen, tuńǵysh ret álipbıin aýystyryp otyr. Ony júzege asyrý - biz úshin zor mártebe, ári úlken jaýapkershilik», - dep atap ótti Baqytjan Saǵyntaev.

Latyn grafıkasyna kóshý boıynsha negizgi jumys baǵyttary jóninde mádenıet jáne sport vıtse-mınıstri A. Raıymqulova, bilim jáne ǵylym mınıstri E. Saǵadıev, qarjy mınıstri B. Sultanov baıandama jasady. Sonymen qatar QR Premer-Mınıstriniń orynbasary E. Dosaev, «Nur Otan» partııasy tóraǵasynyń birinshi orynbasary M. Qul-Muhammed, din isteri jáne azamattyq qoǵam mınıstri N. Ermekbaev, A. Baıtursynov atyndaǵy Til bilimi ınstıtýtynyń dırektory E. Qajybek, fılologııa ǵylymdarynyń doktory, professor, Abaı atyndaǵy Qazaq ulttyq ýnıversıtetiniń kafedra meńgerýshisi T. Aıapova óz pikirlerimen bólisti. 

Qazaq álipbıin latyn grafıkasyna 2025 jylǵa deıin birtindep kóshirý kózdelgen. Birinshi kezeń: 2018-2020 jyldardy, ekinshi kezeń: 2021-2023 jyldardy, úshinshi kezeń: 2024-2025 jyldardy qamtıdy.   

Sonymen qatar aprobatsııalyq kezeń, ustazdar korpýsyn daıyndaý barysy, normatıvtik quqyqtyq bazany jasaý jáne jalpy jańa álipbıdi qoldanysqa engizý úrdisi Ulttyq komıssııanyń jiti nazarynda bolady. 

Otyrys barysynda qoıylǵan mindetterdi júzege asyrý úshin tórt arnaıy jumys tobyn qurý týraly sheshim qabyldandy. Birinshisi -orfografııalyq (qazaq álipbıin latyn grafıkasyna kóshirýde orfografııa men orfoepııa erejelerin daıyndaý úshin). Ekinshisi - ádistemelik (latyn álipbıin úıretý jáne oqytý ádistemesin jasap, ony bilim berý júıesine birtindep engizý úshin). Úshinshisi - termınjasam (latyn grafıkasynyń negizinde qazaq tiliniń termınologııalyq bazasyn júıeleý úshin). Tórtinshisi - saraptamalyq-tehnıkalyq (latyn grafıkasyn ІT-tehnologııa talaptaryna sáıkes keltirý úshin). Jumys toptaryna til bilimi salasynyń kásibı mamandary da tartylatyn bolady.