Úkimet álemdik ekonomıkadaǵy ahýal nasharlaǵan jaǵdaıǵa keshendi sharalar ázirledi
ASTANA. 28 jeltoqsan. QazAqparat - Úkimet álemdik ekonomıkadaǵy ahýal nasharlaǵan jaǵdaıǵa keshendi sharalar ázirledi. Bul týraly búgin Úkimettiń selektorlyq rejimdegi otyrysynda QR Ekonomıkalyq damý jáne saýda mınıstri Qaırat Kelimbetov málim etti.
«Kárim Qajymhanuly, sizdiń tapsyrmańyzben qurylǵan jumys toby múddeli memlekettik organdar men damý ınstıtýttary ókilderiniń qatysýymen álemdik ekonomıkadaǵy ahýal nasharlaǵan jaǵdaıǵa keshendi sharalar qurdy. Ol shuǵyl áreket etý sharalary boıynsha naqty synaqtan ótken jáne jan-jaqty eseptelingen», - dedi mınıstr.
Onyń atap ótýinshe, ekonomıkadaǵy belsendilikti qoldaý úshin ekonomıkany, qurylys jáne ınfraqurylymdardy, turǵyn úı kommýnaldyq sharýashylyqty, turǵyn úı qurylysyn jańǵyrtýǵa baǵyttalǵan ınvestıtsııalyq jobalardy júzege asyrýdy jalǵastyrý josparlanyp otyr.
Sonymen qatar áleýmettik mindettemeler de tolyq kólemde oryndalatyn bolady. Ekonomıkada eńbekpen qamtylǵandardy qoldaý úshin oqytý, jumysshylardy qaıta mamandandyrý jáne olardy jumysqa ornalastyrý, aýyldaǵy kásipkerlikti damytý, áleýmettik jumys oryndaryn qurý syndy is-sharalar júrgiziledi.
«Daǵdarysqa qarsy sıpattaǵy bul is-sharalardyń basym bóliginiń qazirdiń ózinde 2012-2014 jyldarǵa arnalǵan bıýdjette qarastyrylǵandyǵyn atap ótkim keledi», - dedi Q.Kelimbetov.
