Úkimet alaıaq qurylysshylar jymqyrǵan úleskerler qarjysyn jedeldetip qaıtarýǵa nıetti
ASTANA, Shildeniń 27-si. QazAqparat /Marlan Jıembaı/ - El Úkimeti alaıaq qurylysshylar jymqyrǵan úleskerler qarjysyn jedel túrde qaıtaryp, olardyń problemalaryn túbegeıli sheshýge nıetti.
Bul pikirdi búgin Úkimet otyrysynan keıin BAQ ókilderine suhbat bergen Premer-Mınıstr Kárim Másimov aıtty.
«Problemalar bar jáne olardy sheshý qajet. Memleket basshysynyń tapsyrmasyna oraı men kúsh-qurylym organdarymen birge arnaıy keńes ótkizdim. Onda alaıaq qurylysshylar jymqyrǵan úleskerlerdiń resýrstaryn qaıtarý máselesin jedeldetýge qatysty naqty tapsyrma qoıyldy. Olar tolyq qaıtarylǵannan keıin búginde qalyp otyrǵan máselelerdi atalǵan qarajat esebinen sheshemiz», dedi Úkimet basshysy.
Bul oraıda K.Másimov urlanǵan qarajat qaıtarylǵannan keıin úleskerlermen kezdesip, olarmen birge atalǵan máselelerdi talqyǵa salatynyn da málimdedi.
Sonymen qatar ol búgingi tańda Qazaqstan Úkimetiniń úleskerlerdiń qatysýymen elimizde oryn alyp otyrǵan turǵyn úı qurylysy salasyndaǵy máselelerdi retteýde barlyq múmkinshilikterdi jasaǵandyǵyn aıta kele, Elbasynyń tikeleı tapsyrmasymen memleket bıýdjetinen aýqymdy qarajat bólingendigin eske sala ketti.
