Úkimet aqysyz kásiptik jáne texnıkalyq bilim berý boıynsha Jospardy jasaqtaýda - A. Sárinjipov
ASTANA. QazAqparat - Úkimet basshysynyń orynbasary Darıǵa Nazarbaeva jetekshilik etetin arnaıy jumys toby aqysyz kásiptik jáne texnıkalyq bilim berý boıynsha Jospardy 2016 jyldyń sáýirinde aıaqtamaq. Bul týraly QR Bilim jáne ǵylym mınıstri Aslan Sárinjipov málim etti.
"Aǵymdaǵy jyly texnıkalyq mamandyqtar boıynsha aqyly bólimde bilim alyp jatqan stýdentterge 5358 orynǵa respýblıkalyq bıýdjetten memlekettik tapsyrys bólindi. QR Premer-Mınıstriniń tapsyrmasymen Úkimet basshysynyń orynbasary Darıǵa Nazarbaevanyń jetekshil etetin arnaıy jumys toby quryldy. Bul topqa kolledj oqytýshylary, memlekettik organdar, jumys berýshiler, jergilikti bılik ókilderi enip otyr. Bul jumys toby Qazaqstanda kásiptik bilimdi aqysyz júıege kóshirýdiń naqty josparyn jasaqtaýy tıis", - dedi A. Sárinjipov vedomstvonyń alqa otyrysynda.
Osy oraıda mınıstr tıisti departamentterge kásiptik bilim berý salasyndaǵy aqysyz texnıkalyq mamandyqtardy anyqtaý boıynsha jumystardy bastaýdy júktedi.
"Memleket basshysy 2017 jyly aqysyz kásiptik-texnıkalyq bilim berý júıesin engizýdi tapsyrdy. Onyń zańdyq qamtamasyz etý qolymyzda bar. Tıisti ózgerister "Bilim berý týraly" zańǵa engizildi jáne QR Prezıdentimen bekitildi", - deıdi A. Sárinjipov.
Onyń aıtýyna qaraǵanda, elimizde 800-ge tarta kolledj bar. Olarda qazirgi ýaqytta 183 mamandyq boıynsha oqytý júrip jatyr. Onyń ishinde 193 mamandyq texnıkalyq, texnologııalyq jáne aýyl sharýashylyǵy salasynda.
"Aqysyz texnıkalyq jáne kásiptik bilim berý birinshi kezeńde kelesideı sanattarǵa taralady. Birinshisi, jumysshy mamandyqtar boıynsha oqytý 100% memleket tapsyrysy boıynsha júretin bolady. Qazirgi ýaqytta osy mamandyqtar boıynsha oqyp jatqan 97 myń adamnyń 93 myńy tegin oqýda. Endi ol sandy 100% jetkizý úshin 4 myń adamdy aqysyz júıege kóshirý kerek", - dedi mınıstr. - Ekinshiden, jumysshy biligi joq mektep oqýshylary jyl saıyn kóbeıýde. Jyl saıyn 20 myń túlek joǵary oqý oryndary men kolledjderge túspeıdi, 34 myńy kolledjderden, 36 myńy ýnıversıtetterden shyǵarylady eken. Aqysyz kásiptik jáne texnıkalyq bilim berýge osylar tartylady. Sonymen qatar ózin-ózi qamtyǵan, jumysshy biliktiligi joq 29 jasqa deıingi azamattar da bar. Olardy "Jumyspen qamtý-2020" aıasynda oqytý kózdelýde".
