Úkimet ákimdermen birlesip, árbir oblystyń áleýetin arttyrýy tıis - Prezıdent
«Aýmaqtyq saıasat jan-jaqty oılastyrylyp júrgizilýge tıis. Aımaqtar qýatty bolsa, búkil memleket ósip-órkendeıdi. Sondyqtan elimizdiń ákimshilik-aýmaqtyq qurylymy ońtaıly ári tıimdi bolýy kerek. Bul – óte mańyzdy másele. Byltyr jańadan Abaı, Ulytaý jáne Jetisý oblystary qurylǵanyn bilesizder. Bul qadam osy aımaqtardy tyń qarqynmen damytýǵa jol ashty. Biz aımaqtar arasyndaǵy ekonomıkalyq teńsizdikti azaıtý úshin tıimdi sharalar qabyldaýymyz kerek», - dedi Qasym-Jomart Toqaev.
Osy oraıda Prezıdent Úkimet ákimdermen birlesip, árbir oblystyń áleýetin arttyrýdy tapsyrdy.
«Ár aımaqtyń ózine tán múmkindigin tolyq paıdalaný qajet. Men muny birneshe ret aıttym. Sondaı-aq aglomeratsııalardy damytý máselesine basa nazar aýdarǵan jón. Úkimet osyǵan qatysty zańnyń múltiksiz oryndalýyn jáne josparlanǵan jumystyń tıimdi atqarylýyn qamtamasyz etýge tıis», - dedi Memleket basshysy.
