Úkimet aǵymdaǵy jyly jumyssyzdyq kórsetkishi deńgeıiniń ózgerýin boljamaıdy - S. Ahmetov

ASTANA. 23 qazan. QazAqparat - Úkimet aǵymdaǵy jyldyń qorytyndysy boıynsha jumyssyzdyq kórsetkishi deńgeıiniń ózgeretinin boljamaıdy. Búgin Parlament Májilisiniń jalpy otyrysynda «2014-2016 jyldarǵa arnalǵan respýblıkalyq bıýdjet týraly» zań jobasyn talqylaý barysynda depýtattar saýalyna jaýap bergen QR Premer-Mınıstri Serik Ahmetov osylaı málim etti.

«Jumyspen qamtýdy qoldaýǵa qatysty «Jumyspen qamtý-2020» baǵdarlamasy qabyldanǵany belgili. Osy baǵytqa jetkilikti qarajat bólinip keledi. Baǵdarlamanyń birqatar baǵyttary bar, onyń ishinde aýyldyq jerlerge arnalǵan baǵyty naqty júzege asyp keledi. Adamdar barlyq baǵyttar boıynsha da baǵdarlamaǵa qatysyp, ózderine ýaqytsha da, turaqty da jumystaryn taýyp jatyr. 2012 jyldyń qorytyndysy boıynsha jumyssyzdyq 5,2 paıyzdy quraǵan bolatyn. Biz bıylǵy jyly da osy kórsetkish saqtalatynyn kútemiz», - dedi S.Ahmetov.

Budan bólek, Úkimet basshysy Údemeli ındýstrııalyq-ınnovatsııalyq damý baǵdarlamasy aıasynda kóptegen jobalar júzege asyp jatqanyn aıtyp ótti. Budan bólek, «Qoljetimdi baspana-2020» baǵdarlamasy aıasynda 17 turǵyn úı qurylysy kombınattary salynady. «Agrobıznes-2020» baǵdarlamasy da júzege asyp jatyr. «Osynyń barlyǵy halyqtyń bir bóligin, onyń ishinde ásirese ózin-ózi jumyspen qamtýshylar sanatyndaǵylardy jumys oryndarymen qamtamasyz etýge úlken múmkindik beredi», - deıdi S. Ahmetov.