Úkimet «Agrobıznes-2020» baǵdarlamasyn ne úshin qysqartty
ASTANA. QazAqparat - Úkimet «Agrobıznes - 2020» baǵdarlamasyn qysqartyp, ony Agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasy retinde jalǵastyrýdy josparlap otyr. Ulttyq agrarlyq ǵylym-bilim berý ortalyǵynyń sarapshysy Damır Egizbaevtyń aıtýynsha, atalǵan sharalardyń naqty sebebi bar, dep xabarlaıdy QazAqparat tilshisi.
«Endi, burynǵy baǵdarlama úshin qarastyrylǵan bıýdjet qarjysy qaldy. Sonyń esebinen jańa baǵdarlama iske asyrylady. «Agrobıznes», kóbinese iri kásiporyndardy qurýdy kózdese, jańa baǵdarlamada shaǵyn sharýa qojalyqtaryn damytý jumystaryna basymdyq beriledi. Bylaısha aıtqanda, burynǵy aqshaǵa biz aýyl adamdaryn memlekettik qoldaýmen kóptep qamtamasyz etýdi kózdeımiz. Jańa baǵdarlamanyń negizgi aıyrmashylyǵy osy», - dedi Egizbaev QazAqparat tilshisine bergen suxbatynda.
Onyń aıtýynsha, buǵan deıin kooperatıvter qurý týraly zań qabyldansa da, ondaı qurylymdardy memlekettik qoldaýdyń naqty tetikteri jazylmaǵan. Agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasynda sýbsıdııa bólý, nesıeni tómen paıyzben berý jáne taǵy basqa memlekettik qoldaý sharalary qarastyrylǵan.
«Degenmen, sýbsıdııany ýaqytynda bólý máselesi áli de bar. Ol úshin bıýdjet zańnamasyna ózgerister engizý kerek. Fermer sýbsıdııany der kezinde alýy qajet. Ázirshe, ondaı problema bar. Sýbsıdııalar úsh-tórt aıǵa keshigip jatady. Soǵan qaramastan, aldaǵy ýaqytta sýbsıdııalardy aldymen kooperatıvterge (shaǵyn sharýalardyń birlestigi - avt.), sosyn baryp iri ónim óndirýshilerge berý kózdelip otyr», - dep atap kórsetti sarapshy.
Aıta keteıik, búgin Úkimet músheleri agroónerkásip keshenin damytýdyń 2017-2021 jyldarǵa arnalǵan memlekettik baǵdarlamasyn maquldady. «Jaqynda «Agrobıznes - 2020» baǵdarlamasyna ózgeris engizilip, 2013-2017 jyldarǵa deıin qysqartyldy. Sonyń ornyna mınıstrlik jańa memlekettik baǵdarlamany ázirledi. Atalǵan baǵdarlama keıingi 2017-2021 jyldardy qamtıdy. Búgin Úkimet saǵatynda ol baǵdarlama tanystyrylyp qabyldandy», - deıdi E.Axmetov.
Mınıstrliktiń baspasóz qyzmetiniń xabarlaýynsha, búgin Úkimet jańa baǵdarlama boıynsha arnaıy qaýlyny qabyldap, ary qaraı Prezıdent Ákimshiligine jiberdi.
Jańa baǵdarlama aıasynda kooperatıvterge birigetin fermerlerge 6 paıyzdyq nesıeler beriledi. Budan bólek, kooperatıvke satyp alynǵan qondyrǵylardyń 50 paıyzy memlekettiń esebinen óteledi.
