Úkimet 2023 jylǵa arnalǵan josparyn maquldady
ASTANA. QazAqparat – Úkimet 2023 jylǵa arnalǵan zań jobalaý jumystary josparyn maquldady, dep habarlaıdy QazAqparat tilshisi.
«Jalpy zań jobalaý jumystarynyń 2022 jylǵa arnalǵan josparyn oryndaldy dep aıtýǵa bolady. Bıyl konstıtýtsııalyq reforma, Prezıdenttiń saılaýaldy baǵdarlamasy aıasyndaǵy bastamalardy iske asyrý boıynsha jumystar júrgizilgenin atap ótkim keledi. Aldaǵy jyly da reformalardy jalǵastyrý qajet», - dedi QR Premer-Mınıstri Álıhan Smaıylov búgingi Úkimet otyrysynda.
Sonymen birge Á. Smaıylov Ádilet mınıstrliginiń jyl boıy Memleket basshysynyń, Premer-Mınıstrdiń jáne Prezıdent Ákimshiliginiń zańnamalyq tapsyrmalaryna monıtorıng júrgizýdi, olardy 2023 jyly ázirlenip jatqan zań jobalaryna engizýdi qamtamasyz etýi keregin aıtty.
«Bul jumysty memlekettik organdar turaqty negizde júrgizýi tıis. Úkimettiń zań jobalaý jumystarynyń 2023 jylǵa arnalǵan josparyn maquldaýdy usynamyn. Josparǵa 24 zań jobasy kiredi. Olardyń ishinde ázirlenip jatqan Sý kodeksi, «Adam saýdasyna qarsy is-qımyl týraly», «Tutynýshylardyń quqyqtaryn qorǵaý týraly» jáne «Akvadaqyl týraly» zań jobalary erekshe mańyzǵa ıe», - dedi Úkimet basshysy.
Buǵan deıin QR Ádilet mınıstri Qanat Mýsın Úkimettiń 2023 jylǵa arnalǵan zań jobalaý josparynyń jobasyn tanystyrǵan edi.
