Úkimet 2020 jylǵa arnalǵan nysanaly ındıkatorlardy aıqyndady

NUR-SULTAN. QazAqparat – Úkimet 2020 jyly qol jetkizilýi qajet nysanaly ındıkatorlardy aıqyndady. Bul týraly jyldyń birinshi aıyndaǵy damý kórsetkishterine arnalǵan Úkimet otyrysynda QR Ulttyq ekonomıka mınıstri Rýslan Dálenov málim etti, dep habarlaıdy QazAqparat tilshisi.

«Memleket basshysy Úkimettiń jyl basynda ótken keńeıtilgen otyrysynda birqatar tapsyrma bergen bolatyn. Osyǵan baılanysty, Úkimet 2020 jyly qol jetkizilýi qajet nysanaly ındıkatorlardy aıqyndady. Osy jyly birinshi kezekke tıisti mindetter qoıyldy, ıaǵnı jalpy ishki ónimniń ósýin 4,7-5,0 paıyzǵa deıin qamtamasyz etý. Bul 0,2 protsenttik tarmaqqa joǵary», - dedi mınıstr.

Negizgi kapıtalǵa salynǵan ınvestıtsııalar kólemin jalpy ishki ónimniń 20 paıyzyna deıin, sondaı-aq shaǵyn jáne orta bıznestiń úlesin 30 paıyzyna deıin jetkizý eskerilgen.

Budan bólek, shıkizattyq emes eksport kólemin 18,6 mlrd dollarǵa deıin ulǵaıtý eskerilgen, ıaǵnı bul 3,4 mlrd dollarǵa artyq.

Munymen qosa, 15 mln sharshy metr turǵyn úıdi paıdalanýǵa berý josparlanǵan, bul kórsetkish 1,9 mıllıonǵa joǵary.

Atap aıtqanda, 430 myń jumys ornyn qurý jáne halyqtyń naqty tabysyn 6 paıyzǵa arttyrý qarastyrylǵan.

«Bul maqsattarǵa qol jetkizý úshin saýdany, aýyl sharýashylyǵyn, óńdeýdi, qurylysty, kólikti, baılanysty jáne ken óndirýdi ulǵaıtý qajet. Qoıylǵan mindetterdi iske asyrý úshin ortalyq jáne jergilikti atqarýshy organdar nysanaly ındıkatorlardyń oryndalýyn qamtamasyz etýge, qol jetkizilgen ósý qarqyndaryn saqtaýǵa, júıeli monıtorıng júrgizýge jáne jedel sharalar qabyldaýǵa basa nazar aýdarý qajet», - dedi Rýslan Dálenov.